Pakistan vs Namibia : पाकिस्तान आणि नामिबिया (Pakistan vs Namibia) यांच्यातील सामन्यात खिलाडूवृत्तीचा नजराणा अनुभवायला मिळाला. आयसीसीने हा क्षण अधिकृत इन्स्टाग्राम अकाउंटवरुन शेअर केला असून यावर अनेक प्रतिक्रिया उमटताना दिसत आहेत. पाकिस्तानचा कर्णधार बाबर आझम याने नाणेफेक जिंकून पहिल्यांदा फलंदाजी करण्याचा निर्णय घेतला. सलामीवीर रिझवानच्या साथीनं बाबर आझमने पहिल्या विकेटसाठी 113 धावाची मजबूत भागीदारी रचली.

पाकिस्तानची सलामी जोडी ज्यावेळी मैदानात होती त्यावेळी नामिबियाचा गोलंदाज जॅन फ्रायलिंक (Jan Frylinck) गोलंदाजी करताना एक घटना घडली. गोलंदाजी वेळी जॅन मैदानात कोसळला आणि वेदनानी व्याकूळ झाल्याचे दिसले. यावेळी नॉन स्ट्राइकवर असलेल्या बाबरने त्याच्याजवळ जात विचारपूस केल्याचे पाहायला मिळाले. आयसीसीने हा व्हिडिओ शेअर केला आहे. पाकिस्तान-नामिबिया सामन्यात क्रिकेटमधील खिलाडीवृत्ती दिसली, असेही आयसीसीने म्हटले आहे.

'स्पिरिट ऑफ क्रिकेट' या कॅप्शनसह आयसीसीने शेअर केलेल्या व्हिडिओत अंपायरसह नामिबियाचे खेळाडू आणि बाबर-रिझवान जोडी जॅन फ्रायलिंक याची विचारपूस करताना दिसते. क्रिकेट चाहते बाबरवर कौतुकाचा वर्षाव करताना दिसते. बाबरने या सामन्यात 39 चेंडूत अर्धशतक पूर्ण केले. 70 धावांची खेळी करुन तो तंबूत परल्यानंतर रिझवाननेही अर्धशतक झळकावले. त्याने नाबाद 79 धावा केल्या. त्यामुळे पाकिस्तानने निर्धारित 20 षटकात 2 बाद 189 धावा करत नामिबियासमोर जोंगराएवढे आव्हान ठेवले.

बाबरने संघाचे नेतृत्व करताना टी-20 आंतरराष्ट्रीय सामन्यात सर्वाधिक अर्धशतके झळकवण्याचा पराक्रमही आपल्या नावे केला. त्याने भारतीय संघाचा कर्णधार विराट कोहलीला मागे टाकले. कोहलीने 13 वेळा हा पराक्रम केला आहे. बाबरच्या नावे संघाचे नेतृत्व करताना 14 अर्धशतकांची नोंद झालीये.