Jack Alabaster passes away : क्रिकेट चाहत्यांसाठी एक वाईट बातमीसमोर येत आहे. आज म्हणजेच 10 एप्रिल रोजी माजी दिग्गज खेळाडूने जगाचा निरोप घेतला. त्यामुळे संपूर्ण क्रिकेट विश्वात शोककळा पसरली आहे. या खेळाडूचा कसोटी क्रिकेटमध्ये खूप दबदबा होता. या माजी क्रिकेटपटूने आपल्या संघासाठी अनेक सामने स्वबळावर जिंकले, मात्र आज या खेळाडूने जगाचा निरोप घेतला.

क्रिकेट चाहत्यांसाठी ही दु:खद बातमी न्यूझीलंडमधून आली आहे. न्यूझीलंडचा माजी लेगस्पिनर जॅक अलाबास्टर यांनी वयाच्या 93 व्या वर्षी अखेरचा श्वास घेतला. 1955 ते 1972 दरम्यान 21 कसोटी सामन्यामध्ये ते आपल्या देशासाठी खेळले, ज्यात त्यांनी 49 विकेट घेतल्या. या कालावधीत न्यूझीलंड संघाने 4 कसोटी सामने जिंकले होते, जॅक अलाबास्टर देखील या विजयी संघाचा एक भाग होता.

त्यांनी 1955 मध्ये पाकिस्तानविरुद्ध डेब्यू सामना खेळला होता. जॅकने 1955-56 मध्ये भारताला भेट दिली होती. याशिवाय त्यांनी 1958 मध्ये इंग्लंड आणि 1961 ते 1962 मध्ये दक्षिण आफ्रिकेचा दौरा केला होता.

जेव्हा जॅक अलाबास्टर हे कसोटी मालिका खेळण्यासाठी दक्षिण आफ्रिका दौऱ्यावर गेले होते. यादरम्यान त्यांनी न्यूझीलंडच्या विजयात महत्त्वाची भूमिका बजावली. त्यांनी मालिकेतील पहिल्याच सामन्यात 7 विकेट घेत सर्वांना आश्चर्यचकित केले होते. आणि या संपूर्ण मालिकेत जॅकने एकूण 22 विकेट घेतल्या होत्या.

यासोबत देशांतर्गत क्रिकेटमध्ये त्यांनी एकूण 143 सामने खेळले, ज्या दरम्यान 500 बळी घेतले. यावरून ते गोलंदाजीत किती माहीर होते याची कल्पना येईल.