India vs England 3rd Test : टीम इंडिया सध्या राजकोटच्या निरंजन शाह स्टेडियमवर इंग्लंडविरुद्ध पाच सामन्यांच्या कसोटी मालिकेतील तिसरा सामना खेळत आहे. या सामन्याच्या दुसऱ्या दिवशी स्टार फिरकी गोलंदाज आर.अश्विन सामन्याबाहेर होता. कौटुंबिक वैद्यकीय कारणामुळे अश्विनने तिसऱ्या कसोटीतून माघार घेतली होती. पण आता त्याच्या परतल्यावर एक मोठे अपडेट समोर आले आहे.

आर अश्विन इंग्लंडविरुद्ध सुरू असलेल्या तिसऱ्या कसोटीच्या चौथ्या दिवशी राजकोटमध्ये भारतीय संघात सामील होण्यासाठी परतत आहे. तिसऱ्या दिवसाचा खेळ तो पूर्णपणे खेळू शकला नाही. बीसीसीआयने अपडेट दिले आहे की, तो खेळाच्या चौथ्या दिवशीच संघात सामील होईल.

रविचंद्रन अश्विनचे ​​पुनरागमन ही टीम इंडियासाठी दिलासादायक बातमी आहे. अश्विनने इंग्लंडविरुद्धच्या तिसऱ्या कसोटी सामन्याच्या पहिल्या डावात 1 बळी घेत कसोटी क्रिकेटमधील 500 बळी पूर्ण केले. तो भारतासाठी सर्वात वेगवान 500 बळी घेणारा गोलंदाज ठरला आहे. त्याने भारतीय संघासाठी आतापर्यंत 98 कसोटी सामन्यांमध्ये 500 बळी घेतले आहेत. ज्यामध्ये 34 वेळा 5 विकेट्सचा समावेश आहे.