रांची : रांची आणि कोलकाताच्या मधोमध बिहारमध्ये माझे गाव आहे. २०१६ साली मी लेदर बॉलने खेळू लागलो. मला बंगाल क्रिकेट संघटनेने खूप मदत केली. छोट्या गावातून आल्याने मी काही तरी बनावे, असे माझ्या वडिलांचे स्वप्न होते. एकाच वर्षात माझे वडील आणि भाऊ देवाघरी गेले. त्यांच्या जीतेपणी मी त्यांचे स्वप्न साकारू शकलो नाही. त्यामुळे माझ्यासाठी गमावण्यासाठी काहीच नव्हते. कमावण्यासाठी बरेच काही होते. त्याच विचारांनी मी आज मैदानात उतरलो, अशी भावना पदार्पण करणाऱ्या आकाशदीपने व्यक्त केली.

आज मैदानात उतरताना कर्णधार रोहित शर्मा आणि प्रशिक्षकांनी चांगला विश्वास दिला. मी नेहमी टाकतो तशीच गोलंदाजी कर इतकाच साधा सल्ला दिला. खेळाला सुरुवात झाली तेव्हा चेंडू टणक होता, विकेट ताजी होती म्हणून वेगवान गोलंदाजांना थोडी मदत झाली. झॅक क्रॉली माझ्या नो बॉलवर बाद झाला आणि नंतर त्याने सिराजला १८ धावा एका षटकात काढल्यावर मला वाईट वाटले. संघाला माझ्या चुकीचा फटका बसू नये अशी माझी धारणा होती. नंतर मला चांगला मारा करून तीन फलंदाजांना बाद करता आले, असे आकाशदीपने सांगितले.

रांचीची खेळपट्टी संथ झाली आहे. उरलेल्या तीन फलंदाजांना वेळेत बाद करून पहिल्या डावात चांगली फलंदाजी केली तर भारतीय संघ सामन्यात मुसंडी मारू शकतो, असे बोलून आकाशदीप ठसा उमटवून गेला.