BCCI Central Contract : बीसीसीआयने श्रेयस अय्यर व ईशान किशन या दोन्ही क्रिकेटपटूंना धडा शिकवला. आयपीएल डोळ्यांसमोर ठेवून देशांतर्गत क्रिकेटला पाठ फिरवणाऱ्या या दोन्ही खेळाडूंची वार्षिक करारातून हकालपट्टी करण्यात आली. बीसीसीआयकडून या वर्षासाठी करारबद्ध खेळाडूंची यादी बुधवारी जाहीर करण्यात आली. या 30 खेळाडूंच्या यादीतून दोघांनाही बाहेरचा रस्ता दाखवण्यात आला आहे.

ईशान किशन याने वैयक्तिक कारणासाठी सुट्टी घेतली होती. या दरम्यान तो आपला स्थानिक संघ झारखंडचेही प्रतिनिधित्व करीत नव्हता. हार्दिक पांड्या याच्यासोबत तो बडोदे येथे सराव करीत होता. श्रेयस अय्यर यानेही दुखापतीचे कारण सांगून मुंबई संघासाठी रणजी स्पर्धेमधून न खेळण्याचा निर्णय घेतला. मात्र, तो तंदुरुस्त असल्याचे राष्ट्रीय क्रिकेट अकादमीमार्फत सांगण्यात आले.

बीसीसीआयच्या 2023-24 च्या केंद्रीय करारनंतर भारताचा माजी अष्टपैलू खेळाडू इरफान पठाणने ईशान किशन आणि श्रेयस अय्यर यांना पाठिंबा दिला. यासोबतच हार्दिक पांड्यावरून बीसीसीआयला सल्ला दिला आहे.

इरफान पठाण ट्विट करत म्हणाला की, 'श्रेयस आणि इशान दोघेही प्रतिभावान क्रिकेटपटू आहे. आशा आहे की जोरदार पुनरागमन करतील. जर हार्दिक पांड्या सारख्या खेळाडूंना टेस्ट क्रिकेट खेळायचे नसेल, तर त्याने आणि त्याच्यासारख्या इतरांनी राष्ट्रीय कर्तव्यावर नसताना पांढऱ्या चेंडूच्या देशांतर्गत क्रिकेटमध्ये भाग घ्यावा का? जर हे सर्वांना लागू होत नसेल, तर भारतीय क्रिकेट अपेक्षित परिणाम साधू शकणार नाही.

बीसीसीआयचे सचिव जय शहा यांनीही स्थानिक स्पर्धांना प्राधान्य न देणाऱ्या खेळाडूंना बीसीसीआयच्या वार्षिक करारातून वगळण्यात येईल, असा इशारा दिला होता. कर्णधार रोहित शर्मा याच्याकडूनही देशासाठी खेळण्याची भूक असलेल्यांनाच भारतीय संघात संधी देण्यात येईल, असे इंग्लंडविरुद्धच्या चौथ्या कसोटी सामन्यानंतर स्पष्ट करण्यात आले. अखेर बीसीसीआयकडून करारबद्ध खेळाडूंची यादी जाहीर करण्यात आली आणि त्यामधून दोघांनाही वगळण्यात आले.