KL Rahul Jersey No 1 : टी 20 वर्ल्डकप 2024 जिंकणारी टीम इंडिया वादळामुळं बार्बाडोसमध्येच अडकून पडली होती. आज सकाळी विशेष विमानानं टीम इंडिया मायदेशात परतली. यानंतर टीम इंडियाने पंतप्रधान नरेंद्र मोदींची त्यांच्या निवासस्थानी भेट घेतली. यावेळी बीसीसीआयने पंतप्रधान नरेंद्र मोदींना टीम इंडियाची नवी टी 20 जर्सी भेट म्हणून दिली. मात्र यानंतर केएल राहुल चांगलाच चर्चेत आला आहे.

बीसीसीआने टीम इंडियाची नवी टी 20 जर्सी पंतप्रधान नरेंद्र मोदींना भेट दिली. या जर्सीवर नमो असं नाव लिहिलं होतं. याचबरोबर बीसीसीआयने या जर्सीला क्रमांक देखील दिला होता. हा क्रमांक होता एक! यामुळंच केएल राहुल ट्विटरवर ट्रेंड करत होता. अनेक चाहत्यांनी केएल राहुलला टॅग करत त्याला ट्रोल करण्याचा प्रयत्न केला.

केएल राहुल हा टीम इंडियाचा एक दर्जेदार खेळाडू असून तो अनेक वर्षापासून टीम इंडियाकडून खेळतोय. मात्र यंदाच्या टी 20 वर्ल्डकप संघात त्याची निवड झाली नव्हती. दुखापतीतून सावरलेल्या ऋषभ पंत आणि आयपीएल गाजवणाऱ्या संजू सॅमसनला निवडसमितीने झुकतं माप दिलं होतं.

आता केएल राहुलने टीममधील स्थानही गमावलं अन् बीसीसीआयने त्याच्याकडून जर्सी क्रमांक देखील काढून घेतला अशी चर्चा आहे.

दरम्यान, सकाळी पंतप्रधान नरेंद्र मोदींची भेट घेतल्यानंतर टीम इंडिया मुंबईसाठी रवाना झाली. मुंबईत भारतीय संघाची ओपन बसमधून विजयी मिरवणूक काढण्यात येणार आहे. ही मिरवणूक नरीमन पॉईंट पासून वानखेडे स्टेडियमपर्यंत काढण्यात येणार आहे. वानखेडे स्टेडियममध्ये एक छोटा कार्यक्रम होणार असून या कार्यक्रमात टीम इंडियाला बीसीसीआयने घोषित केलेल्या 125 कोटी रूपयांच्या बक्षीस रक्कमेचं वितरण करण्यात येईल.