Pakistan Cricket Team Army Training : पाकिस्तान क्रिकेट बोर्डाचे नवे चेअरमन मोहसीन नक्वी यांनी संघातील खेळाडूंना आर्मी ट्रेनिंगची गरज असल्याचं वक्तव्य केलं. त्यांनी संघाची शारीरिक क्षमता वाढवण्यासाठी याची गरज असल्याचं सांगितलं.

हा कॅम्प 25 मार्च ते 8 एप्रिलदरम्यान आयोजित केला जाणार असल्याचे वृत्त इएसपीएन क्रिकइन्फोने दिले आहे. नक्वी यांनी पाकिस्तानी क्रिकेटपटू हे इस्लामाबादच्या हॉटेलमध्ये असताना ही घोषणा केली. मात्र यावेळी नक्वी यांनी एक अजब कारण देखील दिलं.

इएसपीएन क्रिकइन्फोने दिलेल्या माहितीनुसार नक्वी म्हणतात, 'मी ज्यावेळी लाहोर येथे सामने पाहत होते त्यावेळी मला जाणवलं की पाकिस्तान संघातील एकाही खेळाडूकडे स्टँडमध्ये षटकार मारण्याची क्षमता आहे.'

'ज्यावेळी अशा प्रकारचा षटकार मारला जातो त्यावेळी मला एक विदेशी खेळाडूच असं करू शकतो असं वाटत. मी बोर्डाला खेळाडूंचा फिटनेस वाढवण्यासाठी एक योजना आखण्याची विनंती केली होती. तुम्हाला अशा प्रकारची पॉवर हिटिंग करण्यासाठी विशेष प्रयत्न करावे लागतील.'

नक्वी पुढे म्हणाले की, 'न्यूझीलंडचा संघ पाकिस्तानात येणार आहे. त्यानंतर आयर्लंड आणि इंग्लंड देखील आपल्या देशाचा दौरा करणार आहेत. यानंतर आपल्याला टी 20 वर्ल्डकप खेळायचा आहे. मला आश्चर्य वाटलं की आपण ट्रेनिंग करायचं तरी कधी, वेळच नाहीये.

'मात्र आम्हाला संधी मिळाली. आम्ही काकुल येथील लष्करी अकादमीत सराव सत्र आयोजित केलं आहे. हे सराव सत्र 25 मार्चपासून 8 एप्रिलपर्यंत होईल. पाकिस्तान आर्मी तुम्हाला ट्रेनिंग देणार आहे. आशा आहे की ते तुम्हाला मदत करतील.'

फिटनेस कॅम्पच्या टायमिंगवरून वादंग?

पीसीबी चेअरमनच्या इच्छेखातर ठेवण्यात आलेल्या फिटनेस कॅम्पच्या टायमिंगवरून वाद होण्याची शक्यता आहे. पाकिस्तान सुपर लीग संपल्यानंतर लगेचच हा कॅम्प सुरू होणार आहे. या काळात पाकिस्तानच्या खेळाडूंना थोड्या विश्रांतीची गरज आहे.

पाकिस्तान संघ देखील काही महिन्यापासून सातत्याने क्रिकेट खेळत आहे. अशा परिस्थितीत हा फिटनेस कॅम्प करणं धोक्याचं ठरू शकतं. हा कॅम्प रमजान महिन्यातच आयोजित केला जाणार आहे. संघातील अनेक खेळाडू यावेळी उपवास करत असतात.

(Cricket News In Marathi)