Rohit Sharma Viral Video: रोहित शर्मा मायदेशी येईपर्यंत टी-20 वर्ल्ड कप विजयाचा जल्लोष थांबला नाही. रोहित शर्मा घरी पोहोचताच, त्याचे बालपणीचे मित्र तेथे उपस्थित होते, ज्यांनी त्याचे जोरदार स्वागत केले.

टी20 वर्ल्ड कप 2024 चे विजेतेपद जिंकून मायदेशी परतलेल्या टीम इंडियाचा विजयोत्सव गुरुवार, 4 जुलै रोजी सुमारे 16 तास चालला. बार्बाडोसहून सकाळी 6.00 वाजताच्या सुमारास दिल्लीत पोहोचलेल्या टीम इंडियाने आधी पंतप्रधान नरेंद्र मोदींची भेट घेतली आणि त्यानंतर मुंबईत वर्ल्ड कप जिंकल्याचा आनंद साजरा केला.

मरीन ड्राईव्हवर भारतीय संघाची विजयी मिरवणूक झाल्यानंतर वानखेडे स्टेडियमवर बीसीसीआयकडून खेळाडूंना १२५ कोटी रुपयांचा धनादेश देऊन गौरविण्यात आले.

इतके झाल्यानतंरही भारतीय संघाचा कर्णधार रोहित शर्माचा उत्सव सोहळा येथेच थांबला नाही. रोहित पोहोचल्यानंतरही भारताचा आणि मुंबई इंडियन्सचा युवा खेळाडू तिलक वर्मा, धाकटा भाऊ विशाल यांच्यासह त्याचे मित्र त्याच्या स्वागतासाठी सज्ज झाले होते.

रोहित शर्माच्या स्वागतासाठी सर्वप्रथम सर्व मित्रांनी एका रांगेत उभे राहून त्याला सलामी ठोकली. यानंतर सर्वांनी त्याला खांद्यावर उचलले. या घटनेचा व्हिडिओ सोशल मीडियावर व्हायरल होत आहे.

29 जून रोजी टीम इंडियाने टी20 वर्ल्ड कप 2024 चे विजेतेपदाच्या सामन्यात दक्षिण आफ्रिकेचा 7 धावांनी पराभव करून विजेतेपद पटकावले. मात्र त्यानंतर बार्बाडोसमधील वादळामुळे खेळाडू तीन दिवस तिथेच अडकले होते.

अखेर बीसीसीआयने भारतीय खेळाडूंना विशेष चार्टर्ड विमानाने देशात आणले. यानंतर गुरुवारी संपूर्ण दिवस म्हणजेच भारतीय संघाने दिल्ली आणि मुंबईत हा विजय साजरा केला.

वानखेडे स्टेडियमवर झालेल्या सत्कार समारंभानंतर खेळाडूंनी स्टेडियममध्ये फिरून उपस्थित चाहत्यांचे आभार मानले. यावेळी विराट कोहली, रोहित शर्मा, हार्दिक पांड्यासह टीमचे खेळाडूही डान्स करतानाही दिसले.