भारतीय क्रिकेट संघ सध्या घरच्या मैदानावर इंग्लंडविरुद्ध पाच सामन्यांची कसोटी मालिका खेळत आहे. देशांतर्गत क्रिकेटमध्ये भरपूर धावा करणाऱ्या सर्फराज खानला या मालिकेदरम्यान कसोटी पदार्पण करण्याची संधी मिळाली.

रांची कसोटी सामन्यात भारतीय फलंदाज सर्फराज खान क्षेत्ररक्षण करतानाचा एक व्हिडिओ व्हायरल होत आहे. यामध्ये हेल्मेटशिवाय शॉट फिल्डिंग करताना त्याला कर्णधार रोहित शर्माने फटकारले. हिटमॅनने त्याला स्पष्टपणे सांगितले की, हिरो बनू नको, हेल्मेट घाल. भारतीय कर्णधाराने सर्फराज खानला दुखापत होण्यापासून वाचवले पण पाकिस्तानचा माजी कर्णधार सर्फराज खान त्याच्या चुकीमुळे जखमी झाला.

रविवारी पाकिस्तान सुपर लीग सामन्यामध्ये क्वेटा ग्लैडिएटर्सचा यष्टीरक्षक सर्फराज खानला गंभीर दुखापत झाली. झालं असं की, सामन्यात मोहम्मद वसीमने कॅच घेतल्यानंतर चेंडू हावेत फेकलेला जो थेट सर्फराजच्या डोक्यात लागला. दुखापत इतकी गंभीर होती की त्याला मैदान सोडावे लागले. सर्फराजच्या जागी सज्जाद अली पर्यायी खेळाडू म्हणून मैदानात खेळायला आला.

मुलतान सुल्तान्सच्या डावात शेवटचे षटक सुरू असताना चौथ्या चेंडूवर रीझा हेंड्रिक्सची विकेट पडली. त्याचा कॅच मोहम्मद वसीम ज्युनियरने घेतला. विकेटचा आनंद व्यक्त करण्यासाठी त्याने कॅच घेतल्यानंतर जोरात हावेत फेकला आणि तो सर्फराज अहमदच्या डोक्याला लागला. दुखापत खूप गंभीर होती आणि तो मैदाना बाहेर गेला.