Team India Squad T20 WC24: जून 2024 मध्ये टी20 वर्ल्डकप खेळवला जाणार आहे. हा वर्ल्डकप वेस्ट इंडिज आणि अमेरिकेत होणार आहे. या वर्ल्डकपसाठी आता जवळपास सर्वच सहभागी देश संघबांधणीचा विचार करताना दिसत आहेत.

याचदम्यान गेल्या काही दिवसात अनेक माजी क्रिकेटपटूंनी भारतीय संघात कोणत्या खेळाडूंना जागा मिळू शकते, याबाबत अंदाज व्यक्त केले आहेत. यात आता ब्रायन लाराचाही समावेश झाला असून त्यानेही त्याचा भारतीय संघ जाहीर केला आहे.

ब्रायन लाराने स्टार स्पोर्ट्सशी बोलताना जाहीर केलेल्या भारतीय संघात त्याने विराट कोहली आणि रोहित शर्मा यांना संधी दिली असून युवा खेळाडूंचेही मिश्रण या संघात ठेवले आहे. मात्र त्याने या संघात केएल राहुल आणि मोहम्मद सिराज यांना संधी दिलेली नाही.

त्याने वेगवान गोलंदाजीत संदीप शर्मा आणि मयंक यादव यांना निवडले आहे. या दोघांनीही आयपीएल 2024 मध्ये आपल्या कामगिरीने सर्वांचे लक्ष वेधले आहे. मयंक यंदाच्या हंगामात सर्वात वेगवान चेंडू टाकणारा गोलंदाज आहे.

याशिवाय लाराने त्याच्या संघात यष्टीरक्षक म्हणून ऋषभ पंतला पहिली पसंती दिली असून संजू सॅमसनलाही बॅकअप म्हणून निवडले आहे.

याशिवाय रोहितबरोबर सलामीला यशस्वी जैस्वालला त्याने संधी दिली आहे, तर सूर्यकुमार यादवचीही निवड केली आहे. अष्टपैलू खेळाडूंमध्ये त्याने हार्दिक पांड्या, शिवम दुबे आणि रविंद्र जडेजा यांना संधी दिली आहे, तर फिरकीपटू म्हणून कुलदीप यादवसह युजवेंद्र चहलला निवडले आहे.

ब्रायन लाराचा टी20 वर्ल्डकपसाठी संभाव्य भारतीय संघ -

• रोहित शर्मा, यशस्वी जैस्वाल, विराट कोहली, सूर्यकुमार यादव, ऋषभ पंत, संजू सॅमसन, हार्दिक पंड्या, रवींद्र जडेजा,शिवम दुबे, जसप्रीत बुमराह, अर्शदीप सिंग, संदीप शर्मा, कुलदीप यादव, युझवेंद्र चहल, मयंक यादव.

बीसीसीआय कधी करणार भारतीय संघाची घोषणा

रविवारी (28 एप्रिल) भारतीय संघाबद्दल कर्णधार रोहित शर्माची आणि निवड समीती अध्यक्ष अजित अगरकर यांची दिल्लीमध्ये बैठक झाली आहे. त्यामुळे 1 मे पूर्वी भारतीय संघाची घोषणा होण्याची दाट शक्यता आहे.