WPL 2024 Points Table : दिल्ली कॅपिटल्सने रविवारी महिला प्रीमियर लीगच्या यंदाच्या मोसमातील तिसऱ्या विजयाला गवसणी घातली. त्यांनी गुजरात जायंट्स संघावर २५ धावांनी मात केली. गुजरातचा संघ यंदाच्या मोसमात विजयापासून दूरच आहे. सलग चौथ्या सामन्यात त्यांचा पराभव झाला. दिल्लीचा संघ या विजयासह पहिल्या स्थानावर पोहोचला आहे.

दिल्लीकडून गुजरातसमोर १६४ धावांचे आव्हान ठेवण्यात आले. मात्र गुजरातला २० षटकांत ८ बाद १३८ धावांपर्यंत मजल मारता आली. गुजरातकडून ॲश्‍ले गार्डनर हिने सर्वाधिक ४० धावा केल्या. दिल्लीकडून जेस जॉनासन व राधा यादव यांनी प्रत्येकी तीन फलंदाज बाद केले.

गुजरातने नाणेफेक जिंकून प्रथम क्षेत्ररक्षण करण्याचा निर्णय घेतला. दिल्लीची कर्णधार मेग लॅनिंग हिने ४१ चेंडूंमध्ये सहा चौकार व एक षटकाराच्या साहाय्याने ५५ धावांची खेळी केली. एलिस कॅप्सीने १७ चेंडूंमध्ये २७ धावांची खेळी करीत तिला उत्तम साथ दिली. ॲनाबेल सदरलँड हिने १२ चेंडूंमध्ये २० धावा केल्या. शिखा पांडे हिने तळाला येऊन आठ चेंडूंमध्ये दोन चौकारांसह नाबाद १४ धावांची खेळी केली. दिल्लीने २० षटकांत ८ बाद १६३ धावा फटकावल्या. गुजरातकडून मेघना सिंगने ३७ धावा देत चार फलंदाज बाद केले.

कोण आहे पॉइंट टेबल टॉपर?

गुजरातविरुद्ध एकतर्फी विजय नोंदवल्यानंतर मेग लॅनिंगच्या नेतृत्वाखालील संघाने गुणतालिकेत मोठा बदल केला आहे. मुंबईला मागे टाकत दिल्ली पहिल्या स्थानावर पोहोचली आहे. संघाचा नेट रनरेटही सुधारला आहे. मात्र, दोन्ही संघांचे प्रत्येकी सहा गुण आहेत. या सामन्यातील पराभवासह गुजरात पाचव्या स्थानावर कायम आहे. तिसऱ्या क्रमांकावर यूपी वॉरियर्स असून त्यांच्या खात्यात चार गुण आहेत. त्याचवेळी रॉयल चॅलेंजर्स बंगळुरू चार गुणांसह चौथ्या स्थानावर आहे.

संक्षिप्त धावफलक

दिल्ली कॅपिटल्स २० षटकांत ८ बाद १६३ धावा (मेग लॅनिंग ५५, एलिस कॅप्सी २७, ॲनाबेल सदरलँड २०, मेघना सिंग ४/३७) विजयी वि. गुजरात जायंट्स २० षटकांत ८ बाद १३८ धावा (ॲश्‍ले गार्डनर ४०, जेस जॉनासन ३/२२, राधा यादव ३/२०).