Yashasvi Jaiswal : भारताचा सलामीवीर यशस्वी जैस्वालने तिसऱ्या कसोटीच्या दुसऱ्या डावात दमदार शतक ठोकत भारताला मजबूत स्थितीत पोहचवलं. यशस्वी जैस्वालचं हे कसोटी क्रिकेटमधील तिसरे तर एकूण चौथे शतक ठोकले. त्याने अर्धशतकानंतर आपला गिअर बदलला होता. इंग्लंडच्या गोलंदाजांची यथेच्छ धुलाई करत गिल सोबत नाबाद शतकी भागीदारी रचली.

भारताने आपल्या दुसऱ्या डावात फलंदाजी सुरू केली त्यावेळी इंग्लंडच्या गोलंदाजांना टिच्चून मारा करत दोन्ही सलामीवीरांना शांतच ठेवलं होतं. धावांची गती म्हणावी तशी वाढत नव्हती. त्यातच जो रूटने रोहित शर्माला 19 धावांवर बाद केलं.

दुसऱ्या डावात सावध सुरूवात करणाऱ्या यशस्वी जैस्वालने रोहित बाद झाल्यानंतर आपला गिअर बदलला. गिलने देखील आल्या आल्या आक्रमक फटकेबाजी करण्यासा सुरूवात केली.यशस्वी जैस्वालने 73 चेंडूत 35 धावा केल्या होत्या. त्यानंतर त्याने आक्रमक फलंदाजी करण्यास सुरूवात केली अन् 122 चेंडूत शतक ठोकलं.

भारताने तिसऱ्या दिवशी इंग्लंडचा पहिला डाव 319 धावात गुंडाळला. भारताकडून मोहम्मद सिराजने सर्वाधिक 4 तर कुलदीप यादव आणि रविंद्र जडेजा यांनी प्रत्येकी 2 विकेट्स घेतल्या. इंग्लंडकडून बेन डकेटने दमदार फलंदाजी करत 151 चेंडूत 153 धावा ठोकल्या होत्या. तर बेन स्टोक्सने 40 धावांचे योगदान दिले.

भारताने पहिल्या डावात 126 धावांची आघाडी घेतल्यानंतर दुसऱ्या डावात दमदार फलंदाजी केली. रोहित आणि यैस्वालने 30 धावांची सलामी दिली. त्यानंतर यशस्वी जैस्वाल आणि शुबमन गिलने दुसऱ्या विकेटसाठी 155 धावांची दमदार भागीदारी रचली.