भारत ७३ वा प्रजासत्ताक दिन साजरा करत आहे. यानिमित्त अनेक दिग्गजांनी प्रजासत्ताक दिनाच्या शुभेच्छा दिल्या आहेत. वेस्ट इंडिजचा स्फोटक फलंदाज आणि युनिव्हर्सल बॉस अशी ओळख असलेल्या ख्रिस गेलनं ट्विटरवरून शुभेच्छा दिल्या आहेत.

ख्रिस गेलनं शुभेच्छा देताना त्याला मोदींचा एक खास मेसेज मिळाल्याचंही सांगितलं. ख्रिस गेलनं ट्विटमध्ये म्हटलं की, मी भारतीयांना ७३ व्या प्रजासत्ताक दिनाच्या शुभेच्छा देतो. पंतप्रधान नरेंद्र मोदी यांच्या एका मेसेजमुळे आज दिवसाची सुरुवात झाली. मोदींनी पाठवलेल्या मेसेजमध्ये त्यांच्यासह भारतीयांसोबत असलेल्या माझ्या घनिष्ठ नात्यांबद्दल लिहिलं होतं. तुम्हा सर्वांना युनिव्हर्सल बॉसकडून खूप साऱ्या शुभेच्छा आणि प्रेम.

क्रिकेटचं मैदान आपल्या आगळ्या वेगळ्या स्टाइलने गाजवणारा ख्रिस गेलचा भारतात खास चाहता वर्ग आहे. आय़पीएलमध्ये खेळताना त्यानं भारतीयांची मने जिंकली आहेत. वेस्ट इंडिजच्या दिग्गज खेळाडूंपैकी ख्रिस गेल एक असून. टी २० वर्ल्ड कप जिंकणाऱ्या संघाचा दोन वेळा सदस्य होता. २०१२ आणि २०१६ मध्ये वेस्ट इंडिजने वर्ल्ड कप जिंकला होता. ख्रिस गेलने ४८३ आंतरराष्ट्रीय सामने खेळले आहेत. यात त्यानं १९ हजार ५९३ धावा केल्या असून ४२ शतकांचा समावेश आहे.