रशियाचा (Russia) टेनिसपटू डॅनिल मेदवेदेवने (Daniil Medvedev) जपानच्या योशिहितो निशिओकाचा 6-2, 6-3 असा सरळ सेटमध्ये पराभव करत मॅक्सिकन ओपनच्या (Mexican Open) सेमी फायनमध्ये दिमाखात प्रवेश केला. आता त्याचा सेमिफायनलमध्ये स्पेनच्या राफेल नदालशी सामना होणार आहे. राफेल नदालने (Rafael Nadal) ऑस्ट्रेलियन ओपनच्या (Australian Open) फायनलमध्ये मेदवेदेवचा झुंजार खेळ करत पराभव केला होता. नदालने पहिले दोन सेट गमल्यानंतर सामन्यात पुनरागमन करत सामना जिंकला होता.

आता मॅक्सिकन ओपनमध्ये (Mexican Open) ऑस्ट्रेलिया ओपनचे हे दोन फायनलिस्ट पुन्हा एकदा भिडणार आहेत. याबाबत बोलताना डॅनिल मेदवेदेव म्हणाला की, 'मला माझा बदला (Revenge) घेण्याची एक प्रकारे संधी मिळणार आहे. तुम्हाला रॉजर फेडरर, नोव्हाक जोकोविच, अँडी मरे यांच्याकडून एक चांगली गोष्ट शिकली पाहिजे. ज्यावेळी ते झुंजार सामन्यात पराभूत झाले आहेत त्यांनी या पराभवाचा बदला घेण्याचा प्रयत्न केला आहे.'

जागतिक क्रमवारीत अव्वल असलेला नोव्हाक जोकोविच (Novak Djokovic) जेव्हा दुबईमध्ये उपांत्यपूर्व फेरीत हरला त्यानंतर डॅनिल मेदवेदेवचा जागतिक क्रमवारीत अव्वल स्थान पटकावण्याचा मार्ग मोकळा झाला. याबाबत त्याला सामना झाल्यावर विचारण्यात आले. त्यावेळी तो म्हणाला की, 'ज्यावेळी मला ही बातमी कळाली त्यानंतर सामना खेळणे सोपे नव्हते. ज्यावेळी मला सर्वांचे मेसेज येऊ लागले त्यावेळी मला हे कळाले. मग माझा त्यावर विश्वास बसला.'