Delhi Police Video : एखाद्या खेळाडूची लाखमोलाची संपत्ती ही त्याची बक्षीसं आणि प्रमाणपत्रं असतात. ही प्रमाणपत्रं आणि बक्षीसं सच्चा खेळाडू जीवापाड जपत असतो. मात्र तीच जर गहाळ झाली तर त्याची काय घालमेल होते हे त्या खेळाडूलाच माहिती असतं.

असाच एक किस्सा दिल्लीमध्ये घडला. इंदिरा गांधी इनडोअर स्टेडियममध्ये एक पॅरा स्पोर्ट्सची स्पर्धा आयोजित करण्यात आली आहे. त्या स्पर्धेत सहभागी होण्यासाठी जगदीश एचसी हा पॅरा बँडमिंटनपटू दिल्लीत आला होता.

मात्र या प्रवासादरम्यान, जगदीशची पदके आणि प्रमाणपत्रे असलेली बॅग हरवली. या बॅगमध्ये इतरही महत्वाची कागदपत्रे होती. जगदीशने त्वरित दिल्ली पोलिसांशी संपर्क साधला दिल्ली पोलिस देखील तात्काळ कामाला लागली.

त्यांनी TSR च्या मार्गावरील सर्व सीसीटीव्ही फुटेज पाहिले. अखेर दिल्ली पोलिसांना जगदीशची बॅग ही उत्तर प्रदेशातील लोनी गाझियाबाद येथून मिळाली. दिल्ली पोलिसांनी पॅरा खेळाडूचा ही आयुष्यभराची संपत्ती त्वरित शोधून काढल्याने जगदीश खूप खूष झाला होता. त्याने दिल्ली पोलीस कर्मचाऱ्याला थेट मिठी मारतच आपला आनंद व्यक्त केला.