Dilip Vengsarkar Shikhar Dhawan Captaincy : भारतीय संघाचा WTC Final मध्ये पराभव झाल्यानंतर संघ, खेळाडू, कोच यांच्यावर तर टीका झालीच मात्र आता माजी खेळाडूंच्या रडारवर बीसीसीआय आणि निवडसमिती देखील आली आहे. गेल्या काही वर्षापासून निवडसमिती सदस्यांच्या निर्णयावरून त्यांची विचारसरणी भविष्याचा वेध घेणारी नसल्याचे दिसून आले आहे अशी टीका दिलीप वेंगसरकर यांनी केली आहे.

हिंदूस्तान टाईम्सला दिलेल्या मुलाखतीत भारताचे माजी कर्णधार आणि निवडसमिती अध्यक्ष दिलीप वेंगसरकर म्हणाले की, 'गेल्या सहा - सात वर्षापासून निवडसमितीमध्ये कोणतीही दूरदृष्टी, क्रिकेटचं सखोल ज्ञान आणि क्रिकेटिंग सेन्स दिसलेला नाही ही दुर्दैवाची गोष्ट आहे. त्यांनी ज्यावेळी एकाचवेळी दोन मालिका असतात, मुख्य खेळाडू उपलब्ध नसतात त्यावेळी त्यांनी शिखर धवनला भारतीय संघाचा कर्णधार केलं. याऐवजी तुम्ही भविष्यातील कर्णधार तयार करू शकला असता.'

वेंगसरकर यांनी संधी असूनही भारतीय संघाने भविष्यातील कर्णधार तयार केला नाही याबाबत निराशा व्यक्त केसी. याचबरोबर त्यांनी बीसीसीआयवर देखील टीका केली. त्यांनी फक्त आयपीएल असणं पुरेसं नाही असं म्हणत बीसीसीआयला इशारा दिला.

वेंगसरकर म्हणाले, 'तुम्ही कर्णधार म्हणून कोणालाही तयार केलं नाही. तुम्ही जशा मालिका येत गेल्या तशा तुम्ही त्या खेळत गेलात. तुम्ही सर्वात श्रीमंत क्रिकेट बोर्ड म्हणून बाता मारता, कुठं आहे तुमची बेंच स्ट्रेंथ? आयपीएल असणे, प्रसारण हक्कातून कोट्यावधी रूपये कमवणे फक्त हेच ध्येय असू शकत नाही.'

भारताचा कर्णधार रोहित शर्मा आता आपल्या कारकिर्दीच्या उतरंडीला लागला आहे. मात्र बीसीसीआय आणि निवडसमिती यांच्यात त्याचा कर्णधार म्हणून उत्तराधिकारी कोण याबाबत कोणतीही स्पष्टता नाहीये.

(Sports Latest News)