नवी दिल्ली: "राहुल द्रविडला (Rahul dravid) त्याच्या दूरदृष्टीने काम करु द्या तसेच भविष्याची संघ बांधणी करण्यासाठी त्याला पूर्ण स्वातंत्र्य द्या" अशी विनंती माजी क्रिकेटपटू अजय जाडेजा (Ajay jadeja) यांनी बीसीसीआयला केली (Bcci) आहे. बीसीसीआयने बुधवारी राहुल द्रविडची मुख्य प्रशिक्षकपदी नियुक्ती केली. राहुल रवी शास्त्रींची (Ravi shastri) जागा घेणार आहे. टी२० वर्ल्डकप नंतर मुख्य प्रशिक्षकपदी कायम राहण्याची इच्छा नसल्याचे रवी शास्त्री यांनी आधीच स्पष्ट केले होते. त्यामुळे त्यांच्या जागी नव्या प्रशिक्षकाचा शोध सुरु होता.

राहुल द्रविडच्या निवडीचे अनेकांनी स्वागत केले आहे. "शिस्तीच्या बाबतीत राहुल द्रविड आदर्श आहे. त्याच्या कामाच्या पद्धतीतून भारतीय क्रिकेटपटूंना शिकता येईल, त्यांना फायदा होईल" असे जाडेजाने म्हटले आहे.

"शिस्त आणि समर्पण यामध्ये कोणी आदर्श असेल, तर तो राहुल द्रविड आहे. तुम्हाला कोचकडून अनेक गोष्टी हव्या असतात. पण शिस्त आणि समर्पण या दोन मुख्य गोष्टी आहेत. राहुल द्रविड की, निवडकर्ते, पुढचा टी २० कॅप्टन कोण ठरवणार? हे पाहणे औत्सुक्याचे आहे" जाडेजा क्रिकबझशी बोलत होता. संघ कसा चालवायचा हे राहुल द्रविडला सांगू नका, अशी जाडेजाने बीसीसीआयला विनंती केली.

"जर तुम्ही राहुल द्रविडला आणलय. ते एक मोठं नाव आहे, कमीत कमी त्याच्या दूरदृष्टीने वाटचाल करा. ही माझी बोर्डाला विनंती आहे. राहुल द्रविड तुमच्यासोबत जोडला गेलाय, प्लीज प्लीज त्याच्या दूरदृष्टीवर विश्वास ठेवा. संघ कसा चालवायचा हे राहुल द्रविडला शिकवू नका" असे जाडेजा म्हणाला.