England vs India: इंग्लंड आणि भारत यांच्या एजबॅस्टन येथे पाचव्या कसोटी सामना खेळल्या गेला. या कसोटी सामन्यादरम्यान भारतीय चाहत्यांशी वर्णद्वेषी गैरवर्तन केल्याच्या आरोपानंतर बर्मिंगहॅम पोलिसांनी एका व्यक्तीला अटक केली आहे. बर्मिंगहॅम पोलिसांनी अटक केल्याची माहिती ट्विटवर दिली आहे. त्याला चौकशीसाठी कोठडीत ठेवण्यात आले आहे. इंग्लंडने शेवटच्या दिवशी ही कसोटी 7 गडी राखून जिंकून मालिकेत 2-2 अशी बरोबरी साधली. जॉनी बेअरस्टो आणि जो रूट यांनी नाबाद शतके झळकावली.(eng vs ind police arrest man after racism allegations)

कसोटीच्या चौथ्या दिवसाच्या खेळादरम्यान इंग्लिश चाहत्यांच्या एका गटाने भारतीय चाहत्यांबद्दल असभ्य कमेंट केल्या होत्या, ज्याच्या तक्रारी ट्विटरच्या माध्यमातून जगासमोर आल्या होत्या. यानंतर एजबॅस्टनचे अधिकारी आणि इंग्लंड आणि वेल्स क्रिकेट बोर्ड (ECB) यांनी या प्रकरणाची दखल घेत चौकशी सुरू केली. वेस्ट मिडलँड्स पोलिसांच्या प्रवक्त्याने स्काय स्पोर्ट्स न्यूजला सांगितले की, बर्मिंगहॅममधील कसोटी सामन्यादरम्यान वर्णद्वेषी, अपमानास्पद वागणुकीच्या वृत्ताचा आम्ही तपास सुरू केला आहे.

एका युजरने ही घटना सोशल मीडियावर शेअर केल्यामुळे ही गोष्ट समोर आली आहे. त्याने लिहिले की, स्टँडवर असलेल्या भारतीय चाहत्यांशी थेट वर्णद्वेषी टिप्पण्या केल्या जात आहे. एजबॅस्टनच्या अधिकाऱ्यांना हे कळताच त्यांनी चाहत्यांची माफी मागितली. एजबॅस्टनचे मुख्य कार्यकारी अधिकारी म्हणाले, आम्ही एजबॅस्टनमध्ये सर्वांसाठी सुरक्षितचे वातावरण निर्माण करत आहोत, अशा प्रतिक्रिया ऐकून आम्हाला धक्का बसला.