लंडन : इंग्लंड आणि ऑस्ट्रेलिया यांच्यात सुरु असलेल्या अ‍ॅशेस कसोटी (Ashes Series) मालिकेत इंग्लंडने अत्यंत खराब कामगिरी केली. इंग्लंडचा यंदाच्या अ‍ॅशेस मालिकेत ३ - ० अशा फरकाने दारुन पराभव झाला. अजून मालिकेतील पाचवी कसोटी शिल्लक आहे. मात्र इंग्लंड क्रिकेट बोर्डाने (England Cricket Board) या पराभवाचे खापर आयपीएलवर फोडले आहे. त्यामुळे इंग्लंड क्रिकेट बोर्ड आपल्या खेळाडूंना आयपीएल (IPL) खेळण्यास बंदी घालू शकते. त्यामुळे राजस्थान रॉयल्सची गोची होण्याची शक्यता आहे. कारण राजस्थानने जोस बटलरला रिटेन केले आहे. याचबरोबर सर्वाधिक इंग्लिश खेळाडू हे राजस्थानकडून खेळतात.

माध्यमांमध्ये आलेल्या बातमीनुसार इंग्लंड क्रिकेट बोर्डाचे कार्यकारी संचालक आणि माजी खेळाडू अ‍ॅश्ले जाईल्स (Ashley Giles) यांनी इंग्लंड संघासाठी पूर्ण रोडमॅप तयार केला आहे. यात इंग्लंडच्या खेळाडूंना आयपीएलमध्ये सामिल होण्यापासून रोखण्याची चर्चा सुरु आहे. या वर्षी इंग्लंड मायदेशात न्यूझीलंड विरुद्ध मालिका खेळणार आहे. अ‍ॅशेस मालिकेत खेळणाऱ्या इंग्लंड संघातील बेन स्टोक्स (Ben Stokes) , जोस बटलर (Jos Buttler) आणि जॉनी बेअरस्टो (Jonny Bairstow) हे सातत्याने आयपीएल खेळतात. याचबरोबर मोईन अली देखील चेन्नईकडून खेळणार आहे.

या पूर्वीही इंग्लंड क्रिकेट बोर्डाने आयपीएलमुळे खेळाडूंच्या कामगिरीवर परिणाम होत असल्याची तक्रार केली होती. सध्या भारतात आयपीएलच्या मेगा लिलावाची (IPL Mega Auction) जय्यत तयारी सुरु आहे. जर इंग्लंडकडून काही अधिकृत घोषणा झाली तर फ्रेंचायजी इंग्लंडच्या खेळाडूंमध्ये फारसा रस दाखवणार नाहीत. आपीएलचा मेगा लिलाव बंगळुरूमध्ये १२ आणि १३ फेब्रुवारीला होणार आहे. यंदाच्या आयपीएल हंगामात १० संघ असणार आहेत.