लंडन : इंग्लंडचा मर्यादित षटकांचा कर्णधार इऑन मॉर्गन याने आंतरराष्ट्रीय क्रिकेटमधून निवृत्ती जाहीर केली आहे. इंग्लंडने 2019 मध्ये आपला पहिला वहिला वर्ल्ड कप त्याच्याच नेतृत्वाखाली जिंकला होता. (England World Cup Winner Captain EOIN MORGAN Retire From International Cricket)

इऑन मॉर्गन निवृत्तीची घोषणा करताना म्हणाला की, 'काळजीपूर्वी सखोल विचार करून सल्ला घेतल्यानंतर मी तात्काळ प्रभावाने आंतरराष्ट्रीय क्रिकेटमधून निवृत्ती घेत असल्याचे जाहीर करतो. माझ्या कारकिर्दिचा काळ हा नक्तीच आनंददायी फलदायी ठरला आहे. मात्र आता मला थांबलं पाहिजे असं वाटतं.'

तो पुढे म्हणाला की 'आयर्लंडपासून मी माझ्या आंतरराष्ट्रीय कारकिर्दिची सुरूवात केली. तेथून 2019 चा वर्ल्डकप जिंकेपर्यंत माझ्या कुटुंबियांची मला चांगली साथ लाभली. एका खेळाडूच्या दृष्टीने ती फार महत्वाची असते. माझी आई, वडील, पत्नी, तारा आणि जरभरात विखुरलेले आमचे कुटुंब तुम्ही दिलेल्या पाठिंब्याबद्दल आभार. तुमच्याशिवाय इथंवरचा प्रवास शक्य झाला नसता.'

याचबरोबर मॉर्गनने आपल्या संघातील खेळाडूंचे, प्रशिक्षकांचे आणि चाहत्यांचे देखील आभार मानले. तो म्हणाला की, 'मी स्वतःला नशिबवान समजतो की मला दोन वर्ल्डकप जिंकणाऱ्या संघाचा भाग होता आलं. मर्यादित षटकांच्या क्रिकेटमध्ये इंग्लंडच्या संघाचे भवितव्य उज्वल आहे. आता आपल्याकडे चांगला अनुभव आहे, शक्तीशाली संघ आहे. मी इंग्लंडचा पुढचा प्रवास पाहण्यासाठी खूप उत्सुक आहे.'

इऑन मॉर्गनने 225 एकदिवसीय सामन्यात 6,957 धावा केल्या आहेत. यात 13 शतकांचा देखील समावेश आहे. त्याने 39.74 च्या सरासरीने धावा केल्या. त्याने 126 सामन्यात इंग्लंडचे नेतृत्व केले. त्यात 76 सामन्यात संघाने विजय मिळवला. त्याचे विनिंग पर्सेंटेज हे 60 टक्के इतके आहे. इंग्लंडच्या आतापर्यंतच्या वनडे कर्णधारांपैकी त्याचे विनिंग पर्सेंटेज सर्वाधिक आहे.

त्याने इंग्लंडने टी 20 क्रिकेटमध्ये 72 वेळा नेतृत्व केले. त्याने या सर्वाधिक टी 20 सामन्यात नेतृत्व करण्याच्या एमएस धोनीच्या रेकॉर्डची बरोबरी केली. त्याने 115 टी 20 सामन्यात 2,458 धावा केल्या आहेत. याचबरोबर तो 16 कसोटी सामने देखील खेळला आहे. यात त्याने दोन शतके देखील ठोकली.