Ganguly Shah Hearing : बीसीसीआयच्या कार्यकारिणीत सौरव गांगुली अध्यक्षपदी; तर जय शहा सचिवपदी कायम राहतील की नाही, या प्रश्‍नाचे उत्तर उद्या सर्वोच्च न्यायालयात मिळण्याची शक्यता आहे. बीसीसीआयकडून दाखल करण्यात आलेल्या याचिकेवर उद्या सुनावणी होणार आहे. यामध्ये अंतिम निर्णय होण्याचे संकेत मिळाले आहेत.

गांगुली व शहा या दोन्ही व्यक्तींनी बीसीसीआयमध्ये वर्णी लागण्याआधी अनुक्रमे आपापल्या बंगाल व गुजरात या संघटनांमध्ये पदे भूषवली आहेत. लोढा समितीच्या घटनेनुसार सलग सहा वर्षे पद भूषवल्यानंतर तीन वर्षांचा कूलिंग ऑफ पीरीएड घ्यावा लागतो. यानुसार गांगुली व शहा यांना आपले पद सोडावे लागणार आहे.

लोढा समितीकडून तयार करण्यात आलेल्या नव्या घटनेनुसार ७० वर्षांवरील व्यक्तींना संघटनेत स्थान देता येणार नाही, पण संघटनेत अनुभवी व्यक्ती हव्या आहेत, अशी भूमिका बीसीसीआयने घेतली आहे. बीसीसीआयचा कूलिंग ऑफ पीरीयड या नियमालाही विरोध आहे. लोढा समितीच्या शिफारसीनुसार सलग सहा वर्षे राज्य किंवा बीसीसीआयच्या कार्यकारिणीत काम केल्यानंतर त्या व्यक्तीला तीन वर्षांच्या कूलिंग ऑफ पीरीयडला सामोरे जावे लागते. सर्वोच्च न्यायालय यावर कोणता निर्णय देतेय हे पाहणे रंजक ठरणार आहे.