भुवनेश्वर : भारतात सुरु असलेल्या १७ वर्षांखालील मुलींच्या फुटबॉल विश्वकरंडकाच्या अ गटाच्या आज झालेल्या सामन्यात संभाव्य विजेते ब्राझीलने मोरोक्कोवर १-० अशी मात केली. मोरोक्कोची ही पहिलीच १७ वर्षांखालील मुलींची फूटबॉल विश्वकरंडक स्पर्धा असून ; त्यांनी बलाढ्य ब्राझीलला चांगलीच चिवट लढत दिली. इन्ग्रिड मोराईसने सामन्याच्या पाचव्या मिनिटाला गोल करत ब्राझीलला महत्वाची आघाडी मिळवून दिली.

ब्राझिलकडे सामन्याच्या ६५ टक्के वेळ बॉलचा ताबा होता. ब्राझीलच्या संघाने तब्बल १७ वेळा गोलपोस्टच्या दिशेने बॉल मारला. तर मोरोक्कोला फक्त चार वेळाच गोलपोस्टच्या दिशेने बॉल मारता आला. मोरोक्कोवरच्या विजयाने ब्राझीलने महत्वाचे तीन गुण मिळवले असून अ गटात अमेरिका, भारत, मोरोक्को आणि ब्राझील हे चार संघ आहेत. त्यामुळे या गटात चुरस पाहायला मिळणार आहे.