Kolhapur Football News : कोल्हापूरला फुटबॉलची पंढरी म्हणून ओळखलं जातं. भारतीय क्रिकेट संघानं मोठी मालिका जिंकल्यानंतर किंवा पाकिस्तानला नमवल्यानंतर जसा शिवाजी चौकात कोल्हापुरकरांचा हक्काचा जल्लोष असतोच, पण त्याच्या कैकपटीनं अधिक रोमांच, ईर्ष्या, संघर्ष गल्लोगल्लीमध्ये फुटबाॅलसाठी दिसतो.

सध्या शाहू स्टेडियमवर (Shahu Stadium) सुरू असलेल्या सतेज चषक फुटबॉल स्पर्धेत (Satej Cup Football Tournament) सामन्यावेळी बीजीएम स्पोर्टस् (BGM Sports) आणि झुंजार फुटबॉल क्लबच्या (Zunjar Football Club) खेळाडूंमध्ये किरकोळ कारणावरून मैदानावरच वादावादी झाली. दोन्ही संघाच्या खेळाडूंनी अर्वाच्च भाषेत शिवीगाळ केली. एकमेकांवर धावून जात जोरदार हाणमारी केली.

स्टेडियमवर तणावपूर्ण वातावरण

हा राडा रोखताना पंचांची चांगलीच तारांबळ उडाली. स्टेडियमवरील वातावरण तणावपूर्ण झालं. दरम्यान, पंचांनी दोन्ही संघांच्या प्रत्येकी दोन अशा चार खेळाडूंना रेडकार्ड दाखवत मैदानाबाहेर काढलं. सामना संपण्यासाठी काही मिनिटांचा वेळ बाकी असतानाच, अचानक दोन्ही संघातील खेळाडूंमध्ये धक्काबुक्की सुरू झाली. खेळाडू अर्वाच्य शिवीगाळ करत एकमेकांच्या अंगावर धावून जाऊ लागले. बघता-बघता जोरदार हाणामारी सुरू झाली, त्यामुळं तणाव निर्माण झाला.

दोन्ही संघाच्या खेळाडूंना 'रेडकार्ड'

मैदानावर खेळाडूंमध्ये राडा सुरू असतानाच प्रशिक्षक बसलेल्या ठिकाणीच राखीव खेळाडूंमध्येही हाणामारी सुरू झाली. सुमारे 10 ते 15 मिनिटं गदारोळ सुरू होता. संयोजन समिती व केएसएकडून मध्यस्थी करण्याचा प्रयत्न केला. त्यालाही दोन्ही संघाचे खेळाडू जुमानत नव्हते. अखेर दोन्हीकडच्या वरिष्ठांनी याची दखल घेत वाद मिटवला. दरम्यान, सामना सुरू असताना गैरवर्तन केल्याबद्दल दोन्ही संघाच्या चौघांना रेडकार्ड देण्यात आलं. यामध्ये झुंजार क्लबच्या सूर्यदीप सासणे, अवधुत पाटोळे तर बीजीएम स्पोर्टसच्या अभिजीत साळोखे, महेश जामदार या खेळाडूंचा समावेश आहे.