ऑस्ट्रेलियाचा स्फोटक फलंदाज ग्लेन मॅक्सवेलनं (Glenn Maxwell) व्हायरल होणाऱ्या लग्नपत्रिकेवर पहिली प्रतिक्रिया दिली आहे. एक आठवडाभर चालणाऱ्या विवाह सोहळ्याचा कार्यक्रम सोशल मीडियावर लिक झाल्यामुळे आता सुरक्षा व्यवस्थेवर अधिक भर द्यावा लागणार आहे. मॅक्सवेल आणि त्याची भारतीय वंशाची गर्लफ्रेंड विनी रमन (Vini Raman)27 मार्चला विवाह बंधनात अडकणार आहेत. हा विवाह सोहळा पारंपारिक हिंदू पद्धतीने पार पडणार आहे. (Glenn Maxwell Reacts On Viral Tamil Language Marriage Invitation Card)

मॅक्सवेलला IPL मधील एका सहकाऱ्याकडून लग्नपत्रिका सोशल मीडियावर व्हायरल झाल्याची बातमी दिली. अभिनेत्री कस्तुरी शंकर हिने आपल्या अधिकृत ट्विटर अकाउंटवरुन मॅक्सी आणि विनीची तमिळ भाषेतील लग्न पत्रिका शेअर केली होती. अल्पावधीत ही लग्नपत्रिका चांगलीच व्हायरल झाली.

cricket.com.au ला दिलेल्या मुलाखतीमध्ये मॅक्सवेलनं व्हायरल लग्नपत्रिकेवर भाष्य केले. ही गोष्ट चांगली नाही. आयुष्यातील मोठ्या क्षणासाठी आता मला अतिरिक्त सुरक्षेची तयारी करावी लागले. हा क्षण वैयक्तीक असल्यामुळे मोजक्या मंडळींपर्यंतच गोष्ट मर्यादीत ठेवायची होती. पण भारतीय नातेवाईक खूपच उत्साही झाले आणि त्यांनी मित्रांसोबत लग्नपत्रिका शेअर केली, असेही मॅक्सवेल म्हणाला. काही क्षणात सर्व मीडियाच्या माध्यमातून कार्यक्रम जाहीर झाला. अनेक जण मला ट्विट करु लागले. त्यावेळी मला क्षणभर धक्काच बसला होता, असेही तो म्हणाला. त्याची ही प्रतिक्रिया भारत माहेर घर असलेल्या विनीसाठी काय तुझ्या माहेरची माणसं, असचं काहीतरी सूचित करणारी आहे.

मॅक्सवेल श्रीलंकेविरुद्धच्या टी-20 मालिकेत व्यस्त

मॅक्सवेल सध्या श्रीलंकेविरुद्धच्या टी-20 मालिकेत व्यस्त आहे. नुकतीच त्याने 25 चेंडूत 39 धावांची खेळी केली होती. या सामन्यात ऑस्ट्रेलियाने 6 विकेट्सनी विजय नोंदवत सलग तिसरा विजय नोंदवला होता.