नवी दिल्ली : भारताचा अव्वल फिरकीपटू हरभजन सिंग (Harbhajan Singh) गेल्या अनेक वर्षापासून भारतीय संघाकडून खेळलेला नाही. तो अनेक वर्षापासून भारतीय संघाकडून खेळला नसल्याने तो चाहत्यांच्या विस्मृतीत गेला आहे. मात्र आता हरभजन सिंग (Harbhajan Singh) हा मोठा निर्णय घेण्याच्या तयारीत आहे. तो आपल्या निवृत्तीची घोषणा करण्याची शक्यता आहे. सध्या हरभजन हा आयपीएलमध्येच (IPL) संघात किंवा संघाच्या बेंचवर दिसतो. मात्र आता तो आयपीएलमध्येही वेगळ्या भुमिकेत दिसण्याची शक्यता आहे. (Harbhajan Singh may annouce his retirement)

पीटीआयने दिलेल्या वृत्तानुसार हरभजन सिंग हा आयपीएलमधील एका बड्या फ्रेंचायजीसोबत सपोर्ट स्टाफ म्हणून जोडला जाऊ शकतो. आयपीएलमध्ये (IPL) हरभजन अनेक फ्रेंचायजीकडून खेळला आहे. गेल्या आयपीएल हंगामात हरभाजन कोलकाता नाईट रायडर्सकडून (KKR) खेळला होता. मात्र त्याला अंतिम संघात स्थान मिळाले नव्हते. पीटीआयनुसार हरभजन सिंग (Harbhajan Singh) हा पुढच्या आठवड्यात आपल्या निवृत्तीची घोषणा करण्याची शक्यता आहे.

आयपीएलमधील एका सूत्राने पीटीआयला नाव गुप्त ठेवण्याच्या अटीवर सांगितले की त्यांची फ्रेंचायजी हरभजन सिंगला सहयोगी सल्लागार म्हणून घेण्याची शक्यता आहे. त्यामुळे आगामी आयपीएल लिलावात(IPL Auction) हरभजन या संघाकडून सहभागही नोंदवू शकतो. हरभजन सिंग हा युवा खेळाडूंना मदत करण्यासाठी इच्छुक आहे.

विशेष म्हणजे गेल्या हंगामात हरभजनने केकेआरचा (KKR) फिरकीपटू वरुण चक्रवर्तीला मार्गदर्शन करण्यासाठी बराच वेळ दिला होता. सूत्र म्हणाले की, 'हरभजन हंगाम संपल्यानंतरच आपल्या निवृत्तीची घोषणा करणार होता. तो सध्या एका फ्रेंचायजीबरोबर चर्चा करत आहे. मात्र तो ज्यावेळी या फ्रेंचायजीबरोबर डील पक्की होईल त्यावेळीच यावर बोलणार आहे.'