Pakistan vs Bangladesh T20 World Cup : झिम्बाब्वे भारताचा पराभव करेल आणि आपल्याला द्वेन्टी-२० विश्वकरंडक स्पर्धेची उपांत्य फेरी गाठता येईल, अशी अपेक्षा पाकिस्तान करत असले, तरी त्यांना त्याअगोदर बांगलादेशविरुद्धचा सामना जिंकावा लागणार आहे.

पाकिस्तान-बांगालदेश हा सामना भारत- झिम्बाब्वे सामन्याअगोदर होणार आहे. वास्तविक हा सामना बांगलादेशनेही जिंकला, तर त्यांचेही सहा गुण होतील आणि तेही शर्यतीत येतील, परंतु सध्या त्यांची निव्वळ सरासरी ऊणे असल्याने त्यांना मोठा विजय मिळवावा लागणार आहे.

भारत आणि झिम्बाब्वे या सामन्याचा निकाल काहीही लागला तरी; पाक आणि बांगलादेश कोणत्याही परिस्थितीत विजयासाठीच शर्थ करतील. भारताकडून झालेल्या पराभवानंतर पाकने दक्षिण आफ्रिकेला चीत करून आपली गाडी रुळावर आणली, तर बांगलादेशचा संघ भारताकडून झालेल्या पराभवानंतर सावरत असला तरी भारताला विजयासाठी अखेपर्यंत झुंजवल्यामुळे त्यांचा आत्मविश्वास ढळलेला नाही.

कर्णधार बाबर आझम अपयशी ठरत असला, तरी पाकिस्तानचे इतर फलंदाज फॉर्मात आहेत. महम्मद हॅरिस, इफ्तेकार अहमद आणि शादाब खान यांच्याकडून बांगलादेशच्या गोलंदाजांना सावध राहावे लागणार आहे; तर फॉर्मात आलेला शहीन शाह आफ्रिदी बांगलादेशी फलंदाजांसाठी डोकेदुखी ठरू शकेल. दोन्ही संघांची तुलना करता पाकचे पारडे जड आहे. अॅडलेडच्या मैदानावर हा सामना होणार आहे.