Sourav Ganguly : आज होत असलेल्या बीसीसीआयच्या वार्षिक सर्वसाधारण सभेत रॉजर बिन्नी नवे अध्यक्ष म्हणून सूत्रे स्वीकारतील, इतर पदाधिकाऱ्यांच्या नियुक्तीची औपचारिकताही पार पडेल, पण आयसीसीच्या कार्याध्यक्षपदाच्या निवडणुकीत बीसीसीआय आपला उमेदवार देणार का, हा प्रश्न महत्त्वाचा ठरणार आहे.

ग्रेग बार्कले हे आयसीसीचे पुन्हा कार्याध्यक्ष होण्यास उत्सुक आहेत. त्यासाठी ११ ते १३ नोव्हेंबरदरम्यान मेलबर्न येथे आयसीसीच्या कार्यकारी मंडळाची बैठक होत आहे आणि २० ऑक्टोबरपर्यंत उमेदवारी अर्ज दाखल करायची अंतिम तारीख आहे.

गांगुली यांना शक्य असूनही दुसरी टर्म बीसीसीआयमध्ये न दिल्यामुळे अनेक प्रश्न उपस्थित केले जात आहेत. त्यामुळे गांगुली यांना आयसीसीसाठी उमेदवारी देणार का, अशी चर्चा होत असताना या पदासाठी क्रीडामंत्री अनुराग ठाकूर आणि बीसीसीआयचे माजी अध्यक्ष एन. श्रीनिवासन यांच्याही नावाची चर्चा होत आहे. शेलार आज पदभार स्वीकारणार

मुंबई भाजपचे नेते आशिष शेलार यांचा बीसीसीआय प्रशासनात प्रवेश होत असून खजिनदारपद त्यांना मिळाले आहे. शरद पवार, शशांक मनोहर यांच्यानंतर बीसीसीआयच्या महत्वाचा पदावर असणारे ते तिसरे मराठी व्यक्ती ठरतील.

कर सवलतीबाबत चर्चा अपेक्षित

भारतात पुढील वर्षी एकदिवसीय विश्वकरंडक स्पर्धा होत आहे आणि आयसीसीने कर सवलत मागितली आहे. केंद्र सरकारकडून कर सवलत मिळाली नाही तर बीसीसीआयला आपल्या खिशातून आयसीसीला रक्कम द्यावी लागेल आणि ती ९५५ कोटी इतपत असू शकेल. या मुद्यावर उद्या होणाऱ्या बीसीसीआयच्या बैठकीत चर्चा अपेक्षित आहे.