भारत आणि ऑस्ट्रेलिया यांच्यातील पहिल्या कसोटीच्या दुसऱ्या दिवशी आज भारत आपला पहिला डाव 1 बाद 77 धावांपासून पुढे खेळण्यास सुरूवात केली आहे. भारताचा कर्णधार रोहित शर्मा काल दिवस अखेर 56 धावा करून नाबाद होता. मात्र, आज त्याने शतकी खेळी करत नवा इतिहास घडवला आहे.

तो भारताचा एकमेव असा कर्णधार आहे ज्याने क्रिकेटच्या तिन्ही फॉरमॅटमध्ये शतक केलं आहे. अशी कामगिरी विराट किंवा धोनीलाही जमली नव्हती.

रोहित शर्माने त्याचे ४३ वे शतक ठोकले आहे. तर टेस्टमधील ९ वे शतक आहे. रोहित शर्माने ऑस्ट्रेलियाविरुद्ध १७१ चेंडूत शतक केलं. यात त्याने १४ चौकार आणि २ षटकार मारले. रोहित शर्माचं कसोटी कारकिर्दीतलं हे नववं तर घरच्या मैदानावरचं ८वं शतक ठरलं. ऑस्ट्रेलियाविरुद्ध रोहितचं हे पहिलंच शतक आहे.

रोहित शर्माने एकदिवसीय क्रिकेटमध्ये कर्णधार म्हणून न्यूझीलंड, पाकिस्तान आणि श्रीलंकेविरुद्ध शतक केलं आहे. तर टी२० मध्ये त्याने श्रीलंका आणि वेस्ट इंडिजविरुद्ध शतक केले आहे.

कर्णधार म्हणून सर्व फॉरमॅटमध्ये शतक करणारा तो जगातला चौथा फलंदाज बनला आहे. याआधी अशी कामगिरी श्रीलंकेचा तिलकरत्ने दिल्शान, फाफ डुप्लेसिस आणि बाबर आझम यांनी केलीय.