India vs Australia : भारत आणि ऑस्ट्रेलिया यांच्यातील चार सामन्यांच्या कसोटी मालिकेतील चौथा सामना अनिर्णित राहिला आणि यासह टीम इंडियाने 2-1 ने बॉर्डर गावसकर ट्रॉफीला गवसणी घातली. आता 17 मार्चपासून दोन्ही संघांमध्ये तीन सामन्यांची वनडे मालिका खेळल्या जाणार आहे.

सामन्याच्या पाचव्या दिवशी ऑस्ट्रेलियन संघ आपल्या दुसऱ्या डावात फलंदाजी करत होता. 76 व्या षटकांपर्यंत कर्णधार रोहित शर्माने आपल्या प्रमुख गोलंदाजांसह गोलंदाजी केली. पण यानंतर त्याने 77व्या षटकात शुभमन गिलला बॉल दिला. रोहित इथेच थांबला नाही. शुभमननंतर त्याने चेतेश्वर पुजारालाही गोलंदाजी दिली.

पुढच्या षटकात शुभमनला पुन्हा गोलंदाजीला आला. या षटकाच्या एका चेंडूनंतर ऑस्ट्रेलियाचे फलंदाज मार्नस लॅबुशेन आणि कर्णधार स्टीव्ह स्मिथ या दोघांनीही भारतीय कर्णधार रोहितशी बोलून सामना ड्रॉ करण्याचा निर्णय घेतला. पुजारा आणि शुभमन गोलंदाजीला आले तेव्हा लबुशेन आणि स्मिथही हसत होते.

पुजारा-गिलची गोलंदाजी पाहून दोघांनीही सामना संपवण्याचा निर्णय घेतला. न्यूझीलंडने श्रीलंकेला पराभूत केल्यानंतर भारत जागतिक कसोटी चॅम्पियनशिपच्या अंतिम फेरीसाठी आधीच पात्र ठरला होता. अशा स्थितीत ही कसोटी केवळ औपचारिकता होती. आता वर्ल्ड टेस्ट चॅम्पियनशिपचा अंतिम सामना भारत आणि ऑस्ट्रेलिया यांच्यात जूनमध्ये ओव्हल येथे खेळल्या जाणार आहे.

पुजाराने सामन्यात लेगस्पिन गोलंदाजी केली. यापूर्वी त्याने 2015 मध्ये दक्षिण आफ्रिकेविरुद्धही एकदा गोलंदाजी केली होती. त्या सामन्यात एकही विकेट न घेता दोन धावा दिल्या होत्या. या सामन्यात पुजाराने एका षटकात एक धाव दिली, तर शुभमनने 1.1 षटक टाकून एक धाव दिली. शुभमन क्रिकेटमध्ये पहिल्यांदाच गोलंदाजी करत होता. मात्र पुजाराने कौंटी चॅम्पियनशिपमध्ये ससेक्ससाठी अनेकदा गोलंदाजी केली आहे.