India vs Australia : 2023च्या सुरुवात टीम इंडियासाठी एकदम फर्स्ट क्लास झाली आहे. जानेवारीच्या पहिल्या आठवड्यात श्रीलंकेला त्यानंतर न्यूझीलंडला टी-20 आणि एकदिवसीय मध्ये धूळ चारली, आता टीम इंडियाची नजर ऑस्ट्रेलियाविरुद्ध होणाऱ्या बॉर्डर गावसकर ट्रॉफीवर आहे.

ऑस्ट्रेलिया मालिकेसाठी टीम इंडियाने तयारी सुरू केली आहे. भारतीय संघाने कर्णधार रोहित शर्मा आणि प्रशिक्षक राहुल द्रविड यांच्या नेतृत्वाखाली सराव सुरू केला असून संघातील सर्व खेळाडूंना घाम फुटला आहे. या मालिकेपूर्वी भारतीय संघाने मोठा निर्णय घेतला असून संघात चार खेळाडूंचा समावेश करण्यात आला आहे.

रिपोर्टनुसार, बीसीसीआयने वॉशिंग्टन सुंदर, सौरभ कुमार, साई किशोर आणि राहुल चहर यांना टीम इंडियाशी जोडले आहे. या सर्वांना नेट गोलंदाज म्हणून संघात ठेवण्यात आले आहे, जे संपूर्ण मालिकेसाठी टीम इंडियासोबत राहतील. भारत आणि ऑस्ट्रेलिया यांच्यात 4 कसोटी मालिका होणार आहे, ज्यामध्ये फिरकीपटूंचे वर्चस्व असणार आहे. एकीकडे ऑस्ट्रेलियाने भारतीय फिरकीपटूंना टक्कर देण्याची तयारी केली आहे, तर दुसरीकडे टीम इंडियानेही तयारी सुरू केली आहे.

टीम इंडियाचे हे खेळाडू फक्त फिरकीपटू म्हणून जोडले गेले आहेत. तर भारताकडे जयदेव उनाडकट, मोहम्मद शमी, मोहम्मद सिराज, उमेश यादव असे चार वेगवान गोलंदाज आहेत, जे सराव आणि सामन्यात उपयुक्त ठरू शकतात. फिरकीपटू म्हणून संघात रविचंद्रन अश्विन, रवींद्र जडेजा, अक्षर पटेल आणि कुलदीप यादव यांचाही समावेश आहे. म्हणजेच सरावादरम्यान आता भारताकडे एकूण 8 फिरकीपटू असणार आहेत, अशा स्थितीत फलंदाजांना तयारीसाठी भरपूर संधी असेल.

पहिल्या दोन कसोटी सामन्यांसाठी भारतीय संघ :

रोहित शर्मा (कर्णधार), केएल राहुल (उपकर्णधार), शुभमन गिल, पुजारा, विराट कोहली, श्रेयस अय्यर, केएस भरत (विकेटकीपर), इशान किशन (विकेटकीपर), आर. अश्विन, अक्षर पटेल, कुलदीप यादव, रवींद्र जडेजा, मोहम्मद शमी, मोहम्मद सिराज, उमेश यादव, जयदेव उनाडकट, सूर्यकुमार यादव.

कसोटी मालिकेचे वेळापत्रक :

• पहिली कसोटी - 9 ते 13 फेब्रुवारी, नागपूर

• दुसरी कसोटी - 17 ते 21 फेब्रुवारी, दिल्ली

• तिसरी कसोटी - 1 ते 5 मार्च, धर्मशाला

• चौथी कसोटी - 9 ते 13 मार्च, अहमदाबाद