India vs England Series News 2024 : भारत आणि इंग्लंड यांच्यात विशाखापट्टणम येथे दुसरा कसोटी सामना खेळला जात आहे. यशस्वी जैस्वालच्या द्विशतकाच्या जोरावर भारताने पहिल्या डावात 396 धावा केल्या. प्रत्युत्तरात इंग्लंडचा संघ केवळ 253 धावा करू शकला आणि भारताला पहिल्या डावात 143 धावांची आघाडी मिळाली. दुसऱ्या डावात गिलच्या शतकामुळे भारताने 255 धावा केल्या असून इंग्लंडसमोर विजयासाठी 399 धावांचे लक्ष्य ठेवले.

त्यानंतर 'क्रिकेटचा देव' सचिन तेंडुलकरही गिलच्या खेळीचे कौतुक करताना दिसला. सचिनशिवाय चाहतेही गिलच्या शतकाचे कौतुक करत आहेत. गिलचे शतकही खास आहे कारण याआधी तो धावा काढण्यासाठी सतत धडपडत होता.

विशाखापट्टणम येथे सुरू असलेल्या दुसऱ्या कसोटी सामन्याच्या पहिल्या डावातही गिल जबरदस्त फॉर्ममध्ये दिसत होता. पण जेम्स अँडरसनचा चेंडू गिलच्या बॅटची बाहेरची कड घेऊन यष्टिरक्षकाकडे गेला. गिलने पहिल्या डावात 34 धावा केल्या होत्या. पण दुसऱ्या डावात फलंदाजीला आल्यावर त्याच्यात एक वेगळाच आत्मविश्वास दिसून आला. गिलने एकही वाईट शॉट खेळला नाही, आणि शानदार शतक केले.

यानंतर सचिन तेंडुलकरही सोशल मीडिया 'X' वर गिलच्या शतकाचे कौतुक करताना दिसला. सचिन तेंडुलकरने लिहिले, 'गिलची ही खेळी कौशल्याने भरलेली होती, गिलला त्याच्या शतकाबद्दल अभिनंदन (This innings by Shubman Gill was full of skill! Congratulations on a well timed 100!).

शुभमन गिलने 13 डावांनंतर हे शतक ठोकले. याआधी तो सातत्याने धावा काढण्यासाठी संघर्ष करत होता. त्यामुळे यांच्यावर सर्वत्र टीका होत होत्या. मात्र गिलच्या या शतकानंतर त्याचे टीकाकारही शांत झाले आहेत. मात्र, गिल फॉर्मात आल्यानंतर इंग्लंडविरुद्धच्या उर्वरित सामन्यांमध्ये त्याच्याकडून अशाच चमकदार खेळीची अपेक्षा असेल.