दक्षिण आफ्रिका मालिकेपूर्वी के. एल. राहुल दुखापतग्रस्त झाल्यामुळे कर्णधार होण्याची सुवर्णसंधी मिळालेल्या रिषभ पंतची बॅट गेल्या काही दिवसांपासून शांत आहे. त्यात त्याच्या नेतृत्वाखाली भारतीय संघाने टी-२० सामन्यांत तितकीशी खास कामगिरी केलेली नाही. भारत सध्या या मालिकेत २-२ अशा बरोबरीत आहे. त्याच पार्श्वभूमीवर भारताचा माजी खेळाडू वासीम जाफर याने, पंत अशीच कामगिरी करत राहिल्यास त्याचे टी-२० संघातील स्थानही धोक्यात असल्याचे म्हटले आहे.(IND vs SA After captain Rishabh Pant danger of being out of the team Wasim Jaffer)

‘‘रिषभ पंत हा निडर खेळाडू असून अवघ्या काही षटकांत सामन्याचा मार्ग बदलण्याची क्षमता त्याच्यात आहे, पण त्याची बॅट गेल्या काही दिवसांपासून शांत आहे. विशेषत: टी-२० मध्ये तो त्याच्या नावानुसार आणि स्थितीनुसार कामगिरी करण्यात अपयशी ठरला आहे. दक्षिण आफ्रिकेविरुद्धच्या टी-२० मालिकेतही हे आतापर्यंत पाहायला मिळाले आहे,’’ असे जाफरने यावेळी म्हटले आहे. जाफर पुढे म्हणाला, ‘‘दुखापतीतून परतल्यावर टी-२० संघात के. एल. राहुलचे स्थान निश्चित आहे. तो यष्टीरक्षक म्हणूनही काम करतो. तसेच दिनेश कार्तिकही त्याच्या आयपीएलमधील चांगल्या कामगिरीमुळे संघात वरच्या क्रमांकावर खेळण्यास उत्सुक आहे, त्यात तो चांगला यष्टीरक्षकही आहे. त्यामुळे पंतचा अलीकडचा फॉर्म पाहता, टी-२० संघात त्याचे स्थान निश्चित झाले आहे, असे मला तरी वाटत नाही.’’

द. आफ्रिकेविरुद्धही निराशा पंतने आतापर्यंत दक्षिण आफ्रिकेविरुद्धच्या ४ टी-२० सामन्यांमध्ये एकूण ५७ धावा केल्या आहेत. टी-२० मध्ये अपयश जाफर पुढे म्हणाला, ‘‘पंतला सातत्याने धावा कराव्या लागतील आणि कामगिरीत सातत्य आणावे लागेल. आयपीएल २०२२ मध्येही त्याने आपल्याला साजेशी कामगिरी केलेली नाही. टी-२० मधील त्याची कामगिरी काही काळापासून संदिग्ध आहे. पंतने कसोटी क्रिकेटमध्ये चांगली कामगिरी केली आहे. वनडेतही त्याने काही चांगल्या खेळी खेळल्या आहेत; परंतु हा यष्टिरक्षक फलंदाज टी-२० मध्ये सातत्याने अपयशी ठरला आहे, जी त्याच्या भविष्यासाठी चिंतेची गोष्ट आहे.’’