नवी दिल्ली- भारतीय क्रीडा जगतासाठी एक अत्यंत धक्कादायक बातमी समोर आली आहे. भारतीय अ‍ॅथलेटिक्स संघाचे प्रशिक्षक निकोलई स्नेसारेव हे पटियाला येथील राष्ट्रीय क्रीडा संस्थेच्या हॉस्टेलमधील आपल्या खोलीत मृतावस्थेत आढळून आले आहेत. भारतीय अ‍ॅथलेटिक्स महासंघाने याची माहिती दिली आहे. बेलारुसचे 72 वर्षीय निकोलई स्नेसारेव यांचा मृतदेह शवविच्छेदनासाठी सरकारी रुग्णालयात पाठवण्यात आला आहे. ते सप्टेंबरपर्यंत या प्रशिक्षक पदासाठी भारतात परतले होते. 

एएफआयचे अध्यक्ष आदिल सुमारीवाला याबाबत म्हणाले की, ते शुक्रवारी झालेल्या इंडियन ग्रांपी 3 साठी बेंगळुरु येथून एनआयएसला परतले होते. त्यावेळी ते स्पर्धेसाठी आले नाहीत. त्यामुळे सायंकाळी इतर प्रशिक्षकांनी त्यांच्याबाबत विचारपूस केली. त्यानंतर ते त्यांच्या खोलीत मृतावस्थेत आढळून आले. 

हेही वाचा- मोठी बातमी ! कारच्या फ्रंट सीट पॅसेंजरसाठी एअरबॅग सक्तीचे

मृत्यूचे कारण अद्याप गुलदस्त्यात
सुमारीवाला म्हणाले की, जेव्हा दरवाजा तोडून आत प्रवेश केला. त्यावेळी निकोलई हे त्यांच्या पलंगावर पडलेले दिसले. एनआयएसमध्ये भारतीय क्रीडा प्राधिकरणाच्या डॉक्टरांनी त्यांची तपासणी करुन त्यांना मृत घोषित केले. साईच्या टीमने त्यांचा मृतदेह शवविच्छेदनासाठी सरकारी रुग्णालयात पाठवला. आम्हाला त्यांच्या मृत्यूचे कारण समजू शकलेले नाही. शवविच्छेदनानंतरच याबाबतची माहिती समोर येईल.  

स्नेसारेव हे 3000 मीटर स्टीपलचेज अ‍ॅथलिट अविनाश साबळे आणि इतर मध्य आणि लांब पल्ल्याच्या खेळाडूंना ऑलिम्पिकसाठी पात्र ठरण्यासाठी प्रशिक्षण देत होते. अविनाश साबळेने त्यांच्याऐवजी लष्कराचे प्रशिक्षक अमरिश कुमार यांचे मार्गदर्शन घेण्याचा निर्णय घेतल्यानंतर त्यांनी फेब्रुवारी 2019 मध्ये भारतीय अ‍ॅथलेटिक्स संघाच्या लांब आणि मध्यम पल्ल्याच्या प्रशिक्षकपदाचा राजीनामा दिला होता. त्यावेळी त्यांच्याशी ऑलिम्पिकच्या अखेरीपर्यंत करार होता. कोरोनामुळे एक वर्षासाठी तो स्थगित करण्यात आला होता.