भारतीय संघाचा कर्णधार विराट कोहली (Virat Kohli) आणि त्याची पत्नी अभिनेत्री अनुष्का शर्मा (Anushka Sharma) यांच्या पुढाकारामुळे एका चिमुकल्याचा जीव वाचला आहे. अयांश गुप्ता या चिमुकल्यासाठी विराट-अनुष्का यांनी 16 कोटी रुपयांचा फंड जमा केला. याच पैशातून अयांश गुप्ताला जगातील सर्वात महागडं इंजिक्शन जोल्‍गेनस्‍मा दिलं गेलं. अयांश गुप्ता स्‍पाइनल मस्‍कुलर एट्रोफी या दुर्लभ आजारासोबत झुंज देत आहे. त्याच्या या लढ्यात विराट-अनुष्का यांनी मोलाची भूमिका बजावली. (Virat Kohli, Anushka Sharma help raise funds to save child's life)

स्‍पाइनल मस्‍कुलर एट्रोफी या आजारासोबत अयांश गुप्ता लढा देत आहे. मुलाच्या उपचारासाठी पैसे जमवण्यासाठी अयांशच्या पालकांनी AyaanshFightsSMA या नावाचं ट्विटरवर खातं उघडलं होतं. अयांशसाठी लागणारं जगातील सर्वात महागडं जोल्‍गेनस्‍मा औषधं मिळालं असल्याची माहिती गुप्ता कुटुंबीयांन ट्विटरवर पोस्ट करत दिली होती. यासाठी त्यांनी विराट आणि अनुष्का शर्मा यांचेही आभार व्यक्त केले आहेत.

‘AyaanshFightsSMA’ द्वारे असं ट्विट करण्यात आलं की, 'कोहली आणि अनुष्‍का तुमच्यावर आम्ही एक चाहते म्हणून नेहमीच प्रेम केलं. अयांशसाठी तुम्ही केलेली मदत कधीच विसरु शकत नाही. तुम्ही केलेल्या मदतीमुळे आम्ही जिवनाचा हा सामना जिंकू शकलो. धन्यवाद'

दरम्यान, अनुष्का शर्मा आणि विराट कोहलीने कोरोना विरोधातील मोहिमेच्या माध्यमातून 7 कोटी रुपये जमा करण्याचे लक्ष्य ठेवले होते. अपेक्षित मदतीपेक्षा अधिक रक्कम या मोहिमेतून जमा झाली आहे. या मोहिमेअंतर्गत दोघांनी 11 कोटी इतकी रक्कम जमा केलीये. या जोडीने 2 कोटी रुपये जमा करत या मोहिमेला सुरुवात केली होती. ही रक्कम देशातील कोरोनाग्रस्तांसाठी आवश्यक असलेल्या ऑक्सिजन खरेदीसह अन्य आरोग्यविषयक साहित्य खरेदी करण्यासाठी देण्यात येणार आहे.