ICC Under 19 World Cup 2022 : वेस्ट इंडीजमध्ये सुरु असलेल्या अंडर-19 वर्ल्ड कप स्पर्धच्या 14 व्या हंगामात युवा टीम इंडियाने दमदार सुरुवात केलीये. दक्षिण आफ्रिकेविरुद्धच्या सलामीच्या लढतीत त्यांनी 45 धावांनी विजय नोंदवला. यश धूलच्या नेतृत्वाखालील संघाला विजय मिळवून देण्यात पुण्याच्या विकी ओस्तवाल यानेही मोलाचा वाटा उचलला होता.

पहिल्यांदा बॅटिंग करताना भारतीय संघाची (U19 India) सुरुवात खराब झाली. त्यानंतर कर्णधार यश धूलनं (Yash Dhool) 82 धावांची खेळी करुन संघाचा डाव सावरला. त्याच्या या खेळीच्या जोरावर युवा टीम इंडियाने (U19 India) 232 धावांपर्यंत मजल मारली. या धावांचा पाठलाग करताना विकी ओस्तवालनं (Vicky Ostwal) आफ्रिकेच्या फलंदाजांची फिरकी घेतली. 5 विकेटसह आफ्रिकेचं कंबरडे मोडून विकीनं संघाच्या विजयात मोलाचा वाटा उचलला.

युवा टीम इंडियातील लेफ्ट-आर्म ऑर्थोडॉक्स स्पिनर सध्या चांगलाच चर्चेत आहे. त्याच्या फिरकीतील जादू आयसीसीलाही भावली आहे. दक्षिण आफ्रिकेविरुद्धच्या लढतीत विकीनं मिकी कोपलँड (Mickey Copeland) याला बोल्ड केलं होतं. त्याने जो चेंडू टाकला होता तो कमालीचा होता. त्याने परफेक्ट लेग स्पिनवर कोपलँडची ऑफ स्टंम्प उडवली. त्याचा हा चेंडू भविष्यात तो घातक फिरकीपटू होण्याचे संकेत देणारा आहे. आयसीसीने विकीचे कौतुक करत त्याचा व्हिडिओ शेअर केला आहे.

सध्याच्या घडीला क्रिकेटमध्ये राशिद खान आपल्या लेग स्पिनने प्रतिस्पर्धी संघातील खेळाडूंना नाचवताना दिसते. भारताकडून युजवेंद्र चहलनेही आपल्या फिरकीतील अशा प्रकारेच जादू दाखवून दिली होती. रवि बिश्नोई हा भारतीय संघाचे दरवाजे उघडण्याची वाट पाहत आहे. या पक्तींत उद्या विकीच नाव पाहायला मिळालं तर नवल वाटणार नाही.