Shreyas Iyer and R Ashwin 50 run partnership : कानपूरच्या मैदानात रंगलेल्या पहिल्या कसोटीतील दुसऱ्या डावात भारतीय संघातील आघाडीच्या फलंदाजांनी फ्लॉप शो दाखवला. अवघ्या 51 धावांत टीम इंडियाचा अर्धा संघ तंबूत परतला. त्यानंतर श्रेयस अय्यर आणि अश्विनने संघाचा डाव सावरण्याचा प्रयत्न केला. या जोडीनं सहाव्या विकेटसाठी अर्धशतकी (52) भागीदारी केली. त्यांच्या या खेळीमुळे टीम इंडियाने आपली आघाडी दिडशे पार नेली आहे.

अय्यरपेक्षा कमी चेंडू खेळून त्यापेक्षा अधिक धावा अश्विनने केल्या. तो दमदार खेळी करतोय असे दिसत असताना जेमीसनने पुन्हा एकदा टीम इंडियाला गोत्यात आणले. त्याने अश्विनच्या रुपात टीम इंडियाला सहावा धक्का दिला. अश्विनने 62 चेंडूत 5 चौकाराच्या मदतीने 32 धावांचे योगदान दिले.जोडी फुटली असली तरी हे अर्धशतक भारतीय संघासाठी उपयुक्त असेच आहे. याशिवाय पहिल्या डावातील शतकवीर अय्यरही मैदानात आहे. दुसरी आनंदाची गोष्ट म्हणजे तिसऱ्या दिवशी विकेटमागे न दिसलेला वृद्धिमान साहा बॅटिंगसाठी मैदानात उतरला आहे. ही बाब टीम इंडियासाठी आनंददायी अशीच आहे.

कानपूरच्या मैदानातील रेकॉर्डवर नजर टाकली तर चौथ्या डावात 240 धावाही या मैदानातील सर्वोच्च धावसंख्या आहे. 1958 मध्ये एवढ्या धावा करुनही टीम इंडियाला वेस्ट इंडीज विरुद्धचा सामना गमवावा लागला होता. 2016 मध्ये न्यूझीलंडने चौथ्या डावात 236 धावा केल्या होत्या. यावेळी त्यांनाही पराभवाचा सामना करावा लागला होता. 1976 मध्ये न्यूझीलंडने 7 बाद 193 धावा करत सामना अनिर्णित राखला होता. 1996 कानपूरच्या मैदानात खेळताना दक्षिण आफ्रिकेने चौथ्या डावात 180 धावांपर्यंत मजल मारता आली होती. 1979 मध्ये ऑस्ट्रेलियाने 125 धावा केल्या होत्या. दोन्ही संघाच्या पदरी पराभव आला होता.

कानपूरच्या मैदानात चौथ्या डावात धावांचा पाठलाग करताना जिंकणं मुश्किल असल्याचे आकडेवारीवरुन दिसून येते. अश्विन अय्यरने अर्धशतकी खेळीसह भारतीय संघाला दिडशेपेक्षा अधिक आघाडी मिळवून दिली आहे. तळाच्या फलंदाजांची अय्यरला साथ मिळाली आणि टीम इंडियाने जर आणखी 100 धावा केल्या तर न्यूझीलंडसमोर हे तगडे आव्हान निर्माण करण्यात संघ यशस्वी ठरेल.