IND vs WI 3rd ODI : शिखर धवनच्या नेतृत्वात भारतीय संघाने एकदिवसीय मालिका जिंकली असली, तरी आज होणाऱ्या अखेरच्या लढतीत वेस्ट इंडिजला पराभूत करून तीन सामन्यांच्या मालिकेत 3-0 असे निर्भेळ यश संपादन करण्यासाठी टीम इंडियाचा प्रयत्न असेल. याचप्रसंगी यजमान वेस्ट इंडिजचा संघ तिसऱ्या लढतीत विजय मिळवून शेवट गोड करण्यासाठी सज्ज असेल. यासह सलग आठ लढतींमध्ये झालेल्या पराभवाची मालिका खंडित करण्यासाठीही वेस्ट इंडिजचा संघ प्रयत्नांची शिकस्त करील.

अक्षर पटेलने अखेरच्या षटकांमध्ये केलेल्या दे दणादण फटकेबाजीच्या जोरावर टीम इंडियाने दुसऱ्या लढतीत विजय साकारला आणि वेस्ट इंडिजविरुद्ध सलग 12 मालिका जिंकण्याचा पराक्रम करून दाखवला. यामुळे अखेरच्या लढतीत भारतीय संघात बदल होऊ शकतो.

कर्णधार शिखरने मागील लढतीत 97 धावांची खेळी साकारत आपण फॉर्ममध्ये आल्याचे दाखवून दिले आहे. शुभमन गिलने पहिल्या दोन लढतींत (107 धावा) चमकदार फलंदाजी केली आहे. त्यामुळे त्याला वगळून ॠतुराज गायकवाडला संधी मिळेल, असे वाटत नाही. श्रेयस अय्यरने सलग दोन अर्धशतक झळकाविली आहेत त्यामुळे त्याचे स्थान कायम असू शकेल.

अपटन सहाय्यक स्टाफमध्ये

2011 मध्ये विश्‍वकरंडक जिंकलेल्या भारतीय संघाशी जोडलेले पॅडी अपटन यांची टीम इंडियाच्या सहाय्यक स्टाफमध्ये निवड झाली आहे, अशी माहिती बीसीसीआयच्या सूत्रांकडून मंगळवारी देण्यात आली.