India Women vs England Women 1st ODI : महाराष्ट्राची स्मृती मानधना (९१ धावा), यास्तिका भाटिया (५० धावा ), कर्णधार हरमनप्रीत कौर (नाबाद ७४ धावा) यांच्या धडाकेबाज फलंदाजीच्या जोरावर भारतीय महिला क्रिकेट संघाने रविवारी येथे झालेल्या पहिल्या एकदिवसीय लढतीत यजमान इंग्लंडवर ७ गडी व ३४ चेंडू राखून विजय मिळवला आणि तीन सामन्यांच्या मालिकेत १-० अशी आघाडी घेतली.

इंग्लंडकडून मिळालेल्या २२८ धावांच्या आव्हानाचा पाठलाग करणाऱ्या भारताने फक्त तीन गडी गमावत विजयी लक्ष्य ओलांडले. शफाली वर्मा १ धावेवर बाद झाल्यानंतर स्मृती व यास्तिका या जोडीने ९६ धावांची भागीदारी रचली व डाव सावरला. यास्तिका ५० धावांवर बाद झाली. या खेळीत तिने ८ चौकार व १ षटकार मारला. यानंतर स्मृती व हरमन या अनुभवी जोडीने ९९ धावांची भागीदारी करताना भारताचा विजय जवळपास निश्चित केला. स्मृतीचे शतक ९ धावांनी हुकले. केट क्रॉसच्या गोलंदाजीवर ती बाद झाली; पण तिने आपली खेळी १० चौकार व १ षटकाराने सजवली. हरमन (नाबाद ७४ धावा) व हर्लीन देओल ( नाबाद ६ धावा) यांनी भारताच्या विजयावर शिक्कामोर्तब केले.

त्याआधी भारतीय संघाने नाणेफेक जिंकून प्रथम क्षेत्ररक्षण करण्याचा निर्णय घेतला. इंग्लंडचा संघ हीथर नाईट व नॅट सीव्हर या प्रमुख खेळाडूंच्या अनुपस्थिती या मालिकेत खेळत आहे. या लढतीत इंग्लंडच्या महिला संघातील फलंदाजांना सूर गवसला नाही. सोफीया डंकलीने २९ धावांची, डॅनी वॅटने ४३ धावांची, एलीस रिचर्डस् हिने नाबाद ५० धावांची खेळी साकारली. आठव्या क्रमांकावरील सोफी एक्लेस्टोनने ३१ धावांची व नवव्या क्रमांकावरील चार्ली डीन हिने नाबाद २४ धावांची खेळी केली. त्यामुळे इंग्लंडला ५० षटकांत ७ बाद २२७ धावा तडकावता आल्या.