मुंबई - गानसम्राज्ञी लता मंगेशकर (Lata Mangeshkar) यांच्या निधनानंतर देशभरातून शोक व्यक्त केला जात आहे. विविध क्षेत्रातील मान्यवरांकडून त्यांना श्रद्धांजली वाहिली जात असून लता मंगेशकर यांच्यासोबतच्या आठवणींना उजाळा देत आहेत. भारताचे माजी क्रिकेटपटू दिलीप वेंगसरकर (Dilip Vengasarkar) यांनीही लता मंगेशकर यांच्यासोबतच्या आठवणी ताज्या केल्या. आपल्या गायनाने रसिक श्रोत्यांच्या मनावर अधिराज्य गाजवणाऱ्या लता मंगेशकर यांना गाण्याशिवाय क्रिकेटचीसुद्धा खूप आवड होती. भारताच्या वर्ल्ड कप क्रिकेट संघातील खेळाडू दिलीप वेंगसरकर यांनी त्यांच्यासोबतच्या काही आठवणी सांगितल्या आहेत.

लता मंगेशकर यांचे क्रिकेटवर खूप प्रेम होते. अनेक कसोटी सामन्यांना त्या उपस्थित असायच्या. लंडनला लॉर्डसच्या समोरच त्यांचं घर होतं. क्रिकेटची त्यांना आवड होती. लंडनला सामने असायचे तेव्हा त्या खेळाडुंना घरी बोलवायच्या. मी शतक मारलं होतं तेव्हा त्यांनी गाजर हलवा केला होता. झणझणीत मटण केलं होतं. राजसिंग हे मॅनेजर सोबत होते. त्यांच्यासोबत क्रिकेटवर गप्पा मारायला आवडायचं अशा आठवणी भारताचे माजी क्रिकेटपटू दिलीप वेंगसरकर यांनी सांगितल्या.

लता मंगेशकर यांनी भारताने वर्ल्ड कप जिंकल्यानंतर त्या संघातील खेळाडूंसाठी एक प्रोग्रॅम दिल्लीत केला होता. या कार्यक्रमातून मिळालेले पैसे त्यांनी खेळाडूंना बक्षीस म्हणून दिले होते. याचीही आठवण दिलीप वेंगसरकर यांनी सांगितली. वर्ल्ड कप जिंकल्यानंतर त्यांनी प्रत्येकाला २५ हजार रुपये दिले होते. दिल्लीत प्रोग्रॅम केला होता. त्यानंतर खेळाडूंना प्रत्येकी १ लाख रुपये मिळाले होते.

पहिल्यापासूनच क्रिकेटवर प्रेम असणाऱ्या लता मंगेशकर यांनी अनेकदा क्रिकेटपटूंची भेट घेऊन त्यांचे कौतुक केले होते. वेंगसकर यांनी सांगितलं की, १९७९ मध्ये पाकिस्तानला भारताने पराभूत केलं होतं. त्यानंतर ताज हॉटेलमध्ये लता मंगेशकर यांनी संघाची भेट घेतली होती. तेव्हा त्यांच्यासोबत आशा भोसलेसुद्धा भेटायला आल्या होत्या. त्यांनी सर्वांना बक्षीस दिले आणि कौतुकही केलं होतं.