चेन्नई : अष्टपैलू क्षमता अललेला दक्षिण आफ्रिकेच्या ख्रिस मॉरिसला आयपीएल लिलावात मोठ्या किंमतीची लॉटरी लागली. राजस्थान रॉयल्सने 16 कोटी 25 लाखांत त्याची खरेदी केली. आयपीएलच्या इतिहासात लिलावातून मॉरिसला सर्वाधिक किंमत मिळालेली आहे. त्याखालोखाल न्यूझीलंडचा वेगवान गोलंदाज कायले जेमिसन याला 15 कोटींची किंमत मिळाली; तर ऑस्ट्रेलियाचा ग्लेन मॅक्‍सवेलला विराट कोहलीच्या बंगळूर संघाकडून 14 कोटी 25 लाख रुपये मोजले.

ख्रिस मॉरिससाठी 75 लाख एवढीच पायाभूत किंमत होती. या किमतीवरून त्याने 15.25 कोटींची भरारी घेतली. त्याच्यासाठी मुंबई इंडियन्स आणि बंगळूर यांच्यात अगोदर स्पर्धा झाली. त्यानंतर राजस्थान रॉयल्स शर्यतीत उतरले आणि त्यांनी आयपीएलच्या लिलावात इतिहास घडवला. कसोटी स्पेशालिस्ट पुजाराची निवड होत असताना हनुमा विहारी याला मात्र कोणीही बोली लावली नाही.

ख्रिस मॉरिसची कामगिरी
लिलावात सर्वाधिक किंमत मिळालेल्या मॉरिसनला आयपीएलमध्ये फारशी चांगली कामगिरी केलेली नाही. अमिरातीत झालेल्या आयपीएलमघ्ये तो बंगळूर संघाचा सदस्य होता. 9 सामन्यांत मिळून त्याला 11 विकेटच मिळवता आल्या होत्या आणि त्याने 39 धावाच केल्या. 2 नोव्हेंबरच्या आयपीएलच्या सामन्यानंतर तो एकही आंतरराष्ट्रीय सामना खेळलेला नाही.

जेमिसन दुसऱ्या क्रमांकाचा सर्वाधिक

6.8 फूट उंची असलेल्या न्यूझीलंडच्या कायले जेमिसनला अनपेक्षेतपणे 15 कोटींचा भाव मिळाला. बंगळूर संघाने त्याला आपल्या संघात घेतले. जेमिसन अद्याप भारतात एकदाही खेळलेला नाही, तसेच आतापर्यंत तो न्यूझीलंडकडून चार ट्‌वेन्टी-20 आणि दोन एकदिवसीय सामने खेळलेला आहे. 

ग्लेन मॅक्‍सवेललाही भाव

अमिरातीत झालेल्या आयपीएलमध्ये निराशाजनक कामगिरी केल्यामुळे पंजाब संघाने रिलिज केलेल्या ऑस्ट्रेलियाच्या ग्लेन मॅक्‍सवेललाही चांगला भाव मिळाला. बंगळूर संघ त्याच्यासाठी प्रयत्नशील होता आणि अखेर त्यांनी त्याच्यासाठी 14 कोटी 25 लाख रुपये मोजले. आता विराट कोहली एबी डिव्हिल्यर्ससह तो बंगळूर संघातून खेळेल.

जेय रिचर्डसनसाठी स्पर्धा

ऑस्ट्रेलियाचा तरुण वेगवान गोलंदाज जेय रिचर्डसनसाठी मोठी स्पर्धा झाली. पंजाब किंग्स संघाने त्याला 14 कोटींमध्ये आपल्या संघात घेतले. 2019 मध्ये झालेल्या भारत-ऑस्ट्रेलिया एकदिवसीय मालिकेत रिचर्डसनने कोहलीला सलग तीन सामन्यात बाद केले होते.

केदार जाधव हैदराबादकडे

भारतीय खेळाडूंत अनुभवी आणि अगोदरचे चेन्नई संघातील खेळाडू केदार जाधव तसेच हरभजन सिंग यांना पहिल्या बोलीत कोणत्याही संघाचे उत्सुकता दाखवली नाही, परंतु दुसऱ्या लिलावात त्यांच्यासाठी हैदराबाद आणि कोलकता संघाने पुढाकार घेतला. त्यामुळे यंदा केदार जाधव हैदराबाद तर हरभजन सिंग कोलकाता संघातून खेळतील या दोघांनाही दोन कोटींची पायाभूत रक्कम मिळणार आहे.

कोल्टर नाईल पुन्हा मुंबईकडे

मुंबई इंडियन्सने नॅथन कोल्टर नाईल आणि पॅन्टीन्सन या वेगवान गोलंदाजांना रिलिज केले होते. आजच्या लिलावात कोल्टर नाईलला त्यांनी बोली लावत पाच कोटी रुपयांत पुन्हा आपल्या संघात घेतले. दुसरा वेगवान गोलंदाजासाठी मुंबईने न्यूझीलंडच्या एडम मिल्नला पसंती दिली. त्याच्यासाठी 3.20 कोटी मोजले.

आयपीएल लिलाव दृष्टीपथात
 

• कृष्णाप्पा गौतम भारतीयांमध्ये सर्वाधिक 9.25 कोटींना चेन्नईकडून खरेदी
• स्टीव स्मिथसाठी 2.2 कोटीच, दिल्ली संघात
• मोईन अलीसाठी चेन्नईकडून 7 कोटी
• कसोटी स्पेशालिस्ट चेतेश्‍वर पुजारा चेन्नई संघात 
• लेगस्पिनर पियूष चावला मुंबई संघातून खेळणार
• भारतात एकही सामना न खेळणारा जेमिसन दुसऱ्या क्रमांकाचा सर्वाधिक महाग खेळाडू