IPL 2023 Mini Auction : इंडियन प्रीमियर लीग सुरू झाल्यापासून या लीगची कीर्ती सतत वाढत आहे. लीगमधील संघ आपल्यासोबत चांगले खेळाडू घेण्यासाठी कोणतीही किंमत मोजण्यास तयार आहेत. जेव्हा लिलाव होतो तेव्हा अनेक वेळा अनेक संघ एकाच खेळाडूसाठी बोली लावू लागतात आणि अशा परिस्थितीत त्या खेळाडूची किंमत खूप वाढते. लीगच्या इतिहासात असे अनेक खेळाडू घडले आहेत ज्यांना प्रचंड पैसा मिळाला आहे. या लीगमधील पाच सर्वात महागडे खेळाडू आहेत. कोणाची आहे मक्तेदारी भारतीय की परदेशी पाहू...

2021 च्या हंगामासाठी राजस्थान रॉयल्सने ख्रिस मॉरिसवर मोठा सट्टा खेळला होता. राजस्थानने दक्षिण आफ्रिकेच्या अष्टपैलू खेळाडूला 16.25 कोटी रुपयांना विकत घेतले होते, ज्यामुळे तो लीग इतिहासातील सर्वात महागडा खेळाडू ठरला. मात्र मॉरिस त्याच्यावर लादलेल्या किमतीनुसार कामगिरी करू शकला नाही. पुढच्याच हंगामात त्याला राजस्थानने सोडले.

दिल्ली डेअरडेव्हिल्सने 2015 च्या हंगामासाठी भारतीय खेळाडू युवराज सिंगला 16 कोटी रुपयांना विकत घेतले. युवराज 2021 पर्यंत लीगमधील सर्वात महागडा खेळाडू राहिला होता. आता तो लीग इतिहासातील दुसरा सर्वात महागडा आणि महागडा भारतीय खेळाडू आहे.

2020 च्या मोसमासाठी कोलकाता नाईट रायडर्सने ऑस्ट्रेलियन वेगवान गोलंदाज पॅट कमिन्सला 15.5 कोटी रुपयांना विकत घेतले. त्या मोसमात कमिन्सची कामगिरी फारशी नाही, पण तरीही कोलकात्याने त्याला आपल्यासोबत ठेवले. कमिन्स 2021 च्या हंगामानंतर सोडण्यात आले आणि नंतर अर्ध्या किमतीत पुन्हा विकत घेतले.

2022 मध्ये झालेल्या मेगा लिलावात संघांनी भरपूर पैसे खर्च झाले. मुंबई इंडियन्स देखील त्यापैकी एक आहे. मुंबईने अतिशय हुशारीने आपले पैसे खर्च केले आणि इशान किशनला विकत घेण्यासाठी 15.25 कोटी रुपयांची बोली लावली. किशन हा या लीगमधील दुसरा सर्वात महागडा भारतीय खेळाडू आहे.

इंग्लंडचा स्टार अष्टपैलू खेळाडू बेन स्टोक्सने 2017 मध्ये प्रथमच आयपीएल लिलावात भाग घेतला होता. रायझिंग पुणे सुपरजायंट्सने पहिल्या सत्रात 14.5 कोटी रुपयांची बोली लावून स्टोक्सला सर्वात महागडा खेळाडू बनवले. त्यावेळी स्टोक्स हा सर्वात महागडा परदेशी खेळाडू ठरला होता.