IPL 2023 : दुखापतीमुळे गतवर्षीची आयपीएल आणि यंदा भारतीय संघातून खेळण्यास मुकावे लागलेला वेगवान गोलंदाज आणि अष्टपैलू दीपक चहर तंदुरुस्त झाला असून त्याला या वर्षीच्या आयपीएलचे वेध लागले आहेत.

मी दुखापतीमधून सावरण्यासाठी गेले दोन- तीन महिने प्रचंड मेहनत घेत आहे. पहिल्यांदा मला घोट्याला दुखापत झाली, तर त्यानंतर मांडीचे स्नायू दुखावले. या दुखापती याअतिशय त्रास देणाऱ्या होत्या. जेव्हा जलदगती गोलंदाजाला गंभीर किंवा कित्येक महिने बाहेर बसावे लागेल अशी दुखापत तेव्हा पुनरागमन करणे जास्त अवघड असते, असे चहरने सांगितले.

मी केवळ फलंदाज असतो तर, दुखापतींशिवाय मी सलग कित्येक सामने खेळू शकलो असतो. परंतु, विशेषतः जलदगती गोलंदाजाला सतत दुखापतींचा सामना करावा लागतो. आम्हाला नेहमीच दुखापतींचे भय असते. त्यात मला मागच्या वर्षी दोन कारकिर्द धोक्यात आणणाऱ्या दुखापती झाल्या. दुखापतींमधून जाणे हे कोणालाच आवडत नसते, परंतु खेळाडूला या सर्वाचा कधी ना कधी सामना करावाच लागतो, असे चहर म्हणाला.

भारतीय संघातील अनेक जलदगती गोलंदाजांना दुखापतीमधून जावे लागत आहे. मी जेव्हा पूर्ण लयीमध्ये असतो तेव्हा माझ्याकडून चांगली गोलंदाजी किंवा फलंदाजी होत असते. मनापासून क्रिकेट खेळणे हेच माझे नेहमीचे ध्येय असून ; त्याकरता प्रयत्न करत राहणे माझ्या हातात आहे. आयपीएलमध्ये चांगली कामगिरी करण्यास मी उत्सुक असल्याचा विश्वास त्याने व्यक्त केला.