मुंबई : आयपीएलमध्ये समावेश होत असलेल्या ‘इंम्पॅक्ट खेळाडू’ या नव्या नियमामुळे अष्टपैलू खेळाडूचे महत्त्व कमी होणार नाही, असे मत मुंबई इंडियन्सचा कर्णधार रोहित शर्माने व्यक्त केले. इम्पॅक्ट खेळाडूचा आयपीएलमध्ये किती प्रभाव पडेल हे आत्ताच सांगता येणार नाही; परंतु अष्टपैलू खेळाडूचे महत्त्व संघामध्ये असते तेवढेच राहाणार आहे. सामन्याच्या कोणत्याही स्थितीत तो कलाटणी देऊ शकतो. फलंदाज किंवा गोलंदाज म्हणून त्याचा कधीही वापर करता येत असतो, असे रोहित शर्मा म्हणतो.

अष्टपैलू खेळाडूचा वापर आपण कसाही करू शकतो. पाचवा-सहावा गोलंदाज असो किंवा अतिरिक्त फलंदाज असो, संघाला गरज असते तेव्हा अष्टपैलू खेळाडू उपयोगी ठरत असतो, तसेच त्याच्यामुळे संघाचा समतोलही साधता येत असतो, असे रोहित शर्माने सांगितले.

इम्पॅक्ट खेळाडूचा पर्याय यंदापासून सुरू होत असला तरी सामन्यासाठी निवडण्यात आलेले ११ खेळाडू सर्वोत्तम असणे आणि त्यांच्याकडून सर्वोत्तम कामगिरी होणे महत्त्वाचे असते. इम्पॅक्ट खेळाडूचा नियम यंदा प्रथमच होत आहे. त्याचा वापर कसा करायचा हे अजून कोणालाही समजलेले नाही. सुदैवाने आमचा पहिला सामना २ एप्रिल रोजी आहे, तोपर्यंत चार सामने झालेले असतील आणि त्यातून आम्हालाही तयार होता येईल, असे रोहित म्हणाला.