IPL 2021: पंजाबच्या संघाने १८५ धावांच्या आव्हानाचा पाठलाग करताना शतकी सलामी दिली होती. लोकेश राहुल आणि मयंक अग्रवाल दोघांनीही दमदार फटकेबाजी करत संघाला १२ षटकांमध्ये १२० धावांपर्यंत मजल मारून दिली. त्या दोघांनंतर निकोलस पूरननेही २२ चेंडूत ३२ धावा केल्या. पण शेवटच्या १५ चेंडूत पंजाबच्या संघाला १० धावा करता आल्या नाहीत. पंजाबच्या या धक्कादायक पराभवानंतर मुख्य प्रशिक्षक अनिल कुंबळे यांनी फलंदाजांबद्दल नाराजी व्यक्त केली.

"आमच्या संघासाठी अशा प्रकारचे धक्कादायक पराभव हे आता नित्याचे झाले आहेत. ही बाब चांगली नाही, पण आम्ही दुबईत आलो की असं काहीतरी घडतं. आम्ही आमच्या फलंदाजांना स्पष्ट सूचना दिल्या होत्या की १९ षटकांत सामना जिंका. त्यादृष्टीनेच आमचे फलंदाज खेळत होते. पण आमचं नशीब वाईट असल्याने सामना शेवटच्या षटकापर्यंत पोहोचला. आणि मग आमचे फलंदाज चुकीच्या वेळी बाद होत गेले आणि नवा फलंदाज खेळायला येत राहिला. त्या गोंधळात आमचा संघ पराभूत झाला", असं कुंबळे यांनी स्पष्ट केले.

दरम्यान, राजस्थानने प्रथम फलंदाजी करताना सर्वबाद १८५ धावा केल्या. सलामीवीर एव्हिन लुईस (३६) आणि यशस्वी जैस्वाल (४९) यांनी संघाला चांगली सुरूवात करून दिली. महिपाल लॉमरॉरने तुफान फटकेबाजी करत १७ चेंडूत ४३ धावा कुटल्या. १८६ धावांच्या आव्हानाचा पाठलाग करताना पंजाबचे सलामीवीर राहुल (४९) आणि मयंक अग्रवाल (६७) यांनी १२० धावांची भागीदारी केली. हे दोघे बाद झाल्यावर निकोलस पूरनने (३२) फटकेबाजी केली. एडन मार्क्रमही दमदार फलंदाजी करत होता, पण शेवटच्या दोन षटकात त्याला फारशी फलंदाजी मिळाली नाही. परिणामी शेवटच्या षटकात ४ धावांची गरज असूनही पंजाबला त्या धावा जमवता आल्या नाहीत. कार्तिक त्यागीने शेवटच्या षटकात केवळ १ धाव देत राजस्थानला थरारक विजय मिळवून दिला.