IPL 2023 Amit Mishra : आयपीएल 2023 च्या 58 व्या सामन्यात सनरायझर्स हैदराबाद संघाला लखनौ सुपर जायंट्स विरुद्ध त्यांच्याच घरच्या मैदानावर 7 विकेट्सनी पराभव स्वीकारावा लागला. प्रथम फलंदाजी करताना हैदराबादने 182 धावा केल्या होत्या. प्रत्युत्तरात लखनौ संघाने शेवटच्या षटकात 3 गडी गमावून लक्ष्याचा पाठलाग केला. पण या सामन्यात लखनौचा अनुभवी फिरकी गोलंदाज अमित मिश्राने मोठी चूक केली, त्यामुळे त्याला बीसीसीआयकडून फटकारले.

हैदराबादच्या फलंदाजीच्या वेळी अमित मिश्राने लखनौसाठी 9वे षटक टाकले. त्यानंतर या षटकाच्या तिसऱ्या चेंडूवर हैदराबादचा कर्णधार एडन मार्करामने मिश्राला षटकार ठोकला. त्यावेळी मिश्रा खूपच नाराज दिसत होते. पुढच्या चेंडूवर मार्करामने एक धाव घेत अनमोलप्रीत सिंगला स्ट्राईक दिली.

त्यानंतर पुढच्या चेंडूवर अनमोलने सरळ शॉट खेळला आणि चेंडू थेट मिश्राच्या हातात गेला. हा फलंदाज बाद होताच अमित मिश्रा इतका संतापला की त्याने चेंडू खेळपट्टीत फेकला. यासाठी अमित मिश्राला लाइव्ह मॅचदरम्यान अंपायरने आणि सामन्यानंतर बीसीसीआयने फटकारले आहे.

बीसीसीआयने एका निवेदनात लिहिले की, लखनौ सुपरजायंट्सचा अनुभवी भारतीय फिरकी गोलंदाज अमित मिश्राला आयपीएल आचारसंहितेचे उल्लंघन केल्याबद्दल फटकारण्यात आले आहे. लेग-स्पिनरने आयपीएल आचारसंहितेच्या कलम 2.2 अंतर्गत 'लेव्हल 1' गुन्ह्याची कबुली दिली आहे. मिश्रा यांनी आपली चूक मान्य केली. आयपीएलच्या एका विधानानुसार सामनाधिकाऱ्याचा निर्णय अंतिम आणि 'लेव्हल 1' आचारसंहितेच्या उल्लंघनासाठी बंधनकारक आहे.