IPL 2021 CSK vs PBKS: चेन्नईच्या संघाविरूद्ध पंजाबने अवघ्या १३ षटकात सामना निकालात काढला. चेन्नईने २० षटकात ६ बाद १३४ धावा केल्या होत्या. या आव्हानाचा पाठलाग करताना कर्णधार राहुलने नाबाद ९८ धावांची खेळी करून आपल्या संघाला विजय मिळवून दिला. CSKने सामना जरी गमावला असला तरी चेन्नईच्या दीपक चहरने मात्र मैदानाबाहेर एक वेगळा सामना जिंकला. चहरने आपल्या गर्लफ्रेंडला मॅच संपल्यानंतर स्टेडियममध्ये सर्वांसमक्ष रोमँटिक अंदाजात प्रपोज केलं. अन् तिने देखील लगेचच त्याच्या प्रपोजला होकार देत लग्नबंधनात अडकण्यासाठी होकार दिला.

दरम्यान, सामन्यात चेन्नईच्या संघाने प्रथम फलंदाजीला सुरूवात केली. सलामीवीर ऋतुराज गायकवाड १२ धावांत माघारी परतला. मोईन अली (०), रॉबिन उथप्पा (२), अंबाती रायडू (४) आणि धोनी (१२) या साऱ्यांनीही वाईट कामगिरी केली. पण सलामीवीर फाफ डू प्लेसिसने एक बाजू लावून धरत दमदार अर्धशतक ठोकलं. त्याने ५५ चेंडूत ७६ धावांची खेळी केली. त्यानंतर जाडेजा (नाबाद १५) आणि ब्राव्हो (नाबाद ४) यांनी संघाला २० षटकात ६ बाद १३४ धावांपर्यंत मजल मारू दिली.

या आव्हानाचा पाठलाग करणाऱ्या पंजाबला सामना जिंकण्यासोबतच नेट रनरेटचेही आव्हान होते. त्या दृष्टीने लोकेश राहुलने डावाची सुरूवात केली. त्याने तडाखेबाज खेळी करत आपल्या संघाला विजय मिळवून दिला. मयंक अग्रवाल (१२), सर्फराज खान (०), शाहरूख खान (८) आणि एडन मार्क्रम (१३) हे चौघे चांगली कामगिरी करू शकले नाहीत. पण राहुलने एक बाजूने खिंड लढवली. त्याने ४२ चेंडूत तब्बल ७ चौकार आणि ८ षटकारांसह नाबाद ९८ धावा कुटल्या आणि संघाला विजय मिळवून दिला.