IPL 2023 CSK Deepak Chahar : एमएस धोनीच्या नेतृत्वाखालील चेन्नई सुपर किंग्जला मोठा धक्का बसला आहे. संघाचा स्टार अष्टपैलू दीपक चहर किमान 4-5 सामन्यांसाठी संघाबाहेर गेला आहे. मुंबई (MI vs CSK) विरुद्धच्या सामन्याच्या पहिल्याच षटकात दीपक चहरला हॅमस्ट्रिंगची समस्या आली आणि तो बाहेर गेला. दीपक चेन्नईचा मुख्य गोलंदाज आहे, अशा परिस्थितीत संघाला आगामी सामन्यांमध्ये अडचणींचा सामना करावा लागू शकतो.

चेन्नई सुपर किंग्सला त्यांच्या पुढील काही आयपीएल सामन्यांमध्ये वेगवान गोलंदाज दीपक चहरची उणीव भासू शकते. कारण त्याच्या डाव्या पायाला पुन्हा एकदा दुखापत झाली आहे. हॅमस्ट्रिंगच्या दुखापतीमुळे 2022च्या आयपीएलमधून बाहेर पडलेल्या चहरला शनिवारी मुंबई इंडियन्सविरुद्ध एक षटक टाकल्यानंतर पुन्हा तीच दुखापत जाणवली.

चेन्नईचा माजी स्टार फलंदाज सुरेश रैना जो 'जिओ सिनेमा'साठी कॉमेंट्री करत आहे, म्हणाला, “दीपक ४-५ सामन्यांसाठी बाहेर असेल असे दिसत आहे. कारण त्याला पुन्हा हॅमस्ट्रिंगची दुखापत झाली असून तो अस्वस्थ दिसत आहे. आता दीपक किती दिवसात बरा होऊन संघात परतणार हे पाहणे उत्सुकतेचे ठरणार आहे.

वानखेडेवर झालेल्या या सामन्यात सीएसकेने मुंबईवर 7 गडी राखून दणदणीत विजय मिळवला आहे. रोहित शर्माच्या संघाने प्रथम खेळताना 8 गडी गमावून 157 धावा केल्या होत्या. विजयासाठी दिलेले 158 धावांचे लक्ष्य चेन्नई सुपर किंग्ज संघाने 3 गडी गमावून पूर्ण केले आहे.