दिल्ली कॅपिटल्स विरुद्धच्या सामन्यात 70 धावांची नाबाद खेळी करुनही अपयशी ठरलेल्या संजू सॅमसनला आणखी एक धक्का बसला आहे. दिल्ली कॅपिटल्सच्या पराभवानंतर त्याच्या खिशालाही कात्री लागली आहे. अबू धाबीच्या मैदानात दिल्ली विरुद्धच्या लढतीत षटकांची गती कमी राखल्याबद्दल राजस्थान रॉयल्सचा कर्णधार संजू सॅमसनला 24 लाख रुपयांचा दंड ठोठावण्यात आला आहे.

संजू सॅमसनशिवाय संघातील इतर खेळाडूंच्या मानधनातील 25 टक्के रक्कम कपात करण्यात येणार आहे. संजू सॅमसनच्या दंडात्मक कारवाईच्या रकमेत दुबईतील पंजाब विरुद्धच्या सामन्यासाठी 12 लाख आणि दिल्ली विरुद्धच्या सामन्यातील 12 लाख दंड वसूल करण्यात येणार आहे. जर पुढच्या सामन्यातही संघाच्या षटकांची गती कमी राहिली तर संजू सॅमसनवर एका मॅचची बंदी घालण्याची कारवाई होऊ शकते.

आयपीएलच्या यंदाच्या हंगामात त्याने एकच चूक दुसऱ्यांदा केली आहे. यापूर्वी पंजाब किंग्ज विरुद्धच्या सामन्यातही राजस्थानने निर्धारित वेळेत षटके टाकली नव्हती. अखेरच्या षटकापर्यंत रंगतदार सामन्यात संघाने विजयही नोंदवला होता. पण याच सामन्याची पुन्हा पुनरावृत्ती झाली. आयपीएलच्या नियमावलीचे दुसऱ्यांदा उल्लंघन केल्यामुळे सामना गमावण्यासोबत कॅप्टन आणि प्लेइंग इलेव्हनमधील संघाच्या खिशालाही कात्री लागलीये.

दिल्ली कॅपिटल्स विरुद्धच्या सामन्यात धावांचा पाठलाग करताना राजस्थानला 33 धावांनी पराभवाचा सामना करावा लागला. राजस्थानकडून संजू सॅमसनने कर्णधाराला साजेसा खेळ केला. त्याने 53 चेंडूत 70 धावांची नाबाद खेळी केली. पण त्याची ही खेळी संघाला विजय मिळवून देऊ शकली नाही.