IPL 2021 in UAE: स्पर्धेचा दुसरा टप्पा मुंबई विरूद्ध चेन्नई या सामन्याने सुरू झाला. चेन्नई संघाने नाणेफेक जिंकून फलंदाजी स्वीकारली. पण कॅप्टन कूल धोनीचा हा निर्णय चुकल्याचे दिसून आले. चेन्नई सुपर किंग्ज संघाला पॉवर प्ले मध्ये ३० धावाही करता आल्या नाहीत. पण महत्त्वाचे म्हणजे त्यांचे ३ गडी बाद झाले तर एक गडी दुखापतीमुळे मैदान सोडून गेला. या साऱ्या प्रकारात सुरेश रैना याला त्याच्या बॅटनेच दगा दिल्याचे दिसून आले.

सुरेश रैना विरूद्ध ट्रेंट बोल्ट असा संघर्ष मैदानावर रंगला होता. बोल्टने सलग दोन ते तीन चेंडू बाऊन्सर टाकले. त्यातील एक चेंडू रैनाच्या हेल्मेट जवळूनही गेला. पण रैना त्यातून बचावला. त्यानंतर रैना चेंडूचा बाऊन्स चुकवण्यासाठी क्रीजमधून पुढे आला आणि त्याने जोरदार फटका लगावला. त्यावेळी बॅटची कड लागून चेंडूचा चौकार गेला. पण पुढच्याच चेंडूवर रैनाने हवेत फटका मारताना बॅट तुटली आणि चेंडू जवळच उडल्याने तो झेलबाद झाला.

पाहा व्हिडीओ-

दरम्यान, CSKचा डाव सुरू झाला आणि त्यांच्या २ धावांत २ बळी गेले. सलामीवीर फाफ डू प्लेसिस, मोईन अली आणि अंबाती रायुडू हे तिघेही शून्यावर तंबूत गेले. डू प्लेसिस आणि मोईन अली हे दोघे शून्यावर बाद झाले. तर अंबाती रायुडू दुखापतग्रस्त होऊन तंबूत गेला. त्यानंतर रैना बाद झाला. कर्णधार महेंद्रसिंग धोनीकडून अपेक्षा होत्या पण तोदेखील स्वस्तात बाद झाला. पण रविंद्र जाडेजा आणि ड्वेन ब्राव्हो या दोघांच्या साथीने मराठमोळ्या ऋतुराज गायकवाडने सामना रंगवला. ऋतुराजने ५८ चेंडूत नाबाद ८८ धावा कुटल्या. त्याने ९ चौकार आणि ४ षटकार लगावले. जाडेजाने २६ धावा केल्या. तर ड्वेन ब्राव्होने ३ षटकारांसह ८ चेंडूत २३ धावा केल्या.