नवी दिल्ली: पंजाब किंग्जने (Punjab Kings) आयपीएल 2022 (IPL 2022) च्या हंगामासाठी आपला सराव सुरू केला आहे. संघातील खेळाडू मैदानावर तर संघ व्यवस्थापन मैदानाबाहेरच्या तयारीत गुंतले आहेत. दरम्यान, पंजाब किंग्जने आपल्या सोशल मीडिया अकाऊंटवरून एक व्हिडिओ शेअर केला. हा व्हिडिओ सध्या चर्चेचा विषय झाला आहे. पंजाब किंग्जचा धडाकेबाज फलंदाज शाहरूख खानचा (Shahrukh Khan) हा व्हिडिओ आहे.

पंजाब किंग्ज आपल्या पहिल्या वहिल्या आयपीएल विजेतेपदासाठी (IPL Title) यंदाच्या हंगामात चांगलाच जोर लावणार आहे. पंजाब आतापर्यंत फक्त एकदाच आयपीएलची अंतिम फेरी गाठू शकली होती. मात्र यंदा पंजाब शाहरूख खान सारख्या प्रतिभावंत खेळाडूंना घेऊन नव्या आशेने मैदानात उतरणार आहे. शाहरूख खानने यंदाच्या देशांतर्गत स्पर्धेत धडाकेबाज कामगिरी केली आहे. त्याने तामिळनाडूला प्रसिद्ध मुश्ताक अली टी 20 स्पर्धेत अंतिम फेरीत पोहचवले होते. तामिळनाडूने मुश्ताक अली ट्रॉफीवर आपले नाव कोरले.

पंजाबच्या शाहरूख खानचे नाव हे बॉलिवूड स्टार आणि कोलकाता नाईट रायडर्सचा (Kolkata Knight Riders) मालक शाहरूख खान (Bollywood Star Shahrukh Khan) याच्या नावावरून ठेवण्यात आले आहे. त्यामुळे हा पंजाबकडून खेळणारा शाहरूख खान कायम चर्चेचा विषय असतो. शाहरूख आपल्या धडाकेबाज फलंदजीमुळे सामन्याचे चित्र क्षणात पालटण्याची क्षमता ठेवतो. पंजाबने शाहरूख खानने आपला सराव सुरू करतानाचा एक व्हिडिओ आपल्या सोशल मीडिया अकाऊंटवरून शेअर केला. त्या व्हिडिओच्या बॅकग्राऊंडला बॉलीवूड स्टार शाहरूख खानच्या बादशाह चित्रपटातील टायटल साँग लावले आणि त्याला बादशाह ओ बादशाह असे कॅप्शनही दिले.